Bainvegni en la biblioteca chantunala dal Grischun 

 

La biblioteca chantunala dal Grischun è naschida l'onn 1883 da la biblioteca da la scola chantunala. Oz è ella en possess da var 365'000 purtaders d’infurmaziun, tranter quels 1’000 revistas e gasettas abunadas, 3’200 documents sonors, 1'400 mediums audiovisuals ed 11'500 documents da maletgs sco tagls, fotografias, chartas geograficas e placats. Il creschament annual importa ca. 9'000 unitads.

Sco biblioteca d’archiv grischuna è la biblioteca chantunala il lieu da rimnada central per la Retica, q.v.d. per tut ils mediums che vegnan stgaffids en il Grischun u che pertutgan il Grischun cun lur cuntegn o lur paternitad. La collecziun retica cumpiglia sper ils stampats ina vasta paletta da purtaders d’infurmaziun sco mediums audiovisuals, placats, graficas u reproducziuns da maletgs (cf. er collecziuns spezialas). La collecziun da la biblioteca chantunala cumplettescha la collecziun da l’archiv chantunal dal Grischun en il medem edifizi.


Sco biblioteca da studi e da furmaziun sustegna la biblioteca chantunala la furmaziun, la scienza e la cultura cun l’intermediaziun da mediums correspundents en las trais linguas dal chantun. Sper materials per in grond spectrum da temas da cuntegn maina la biblioteca ovras classicas en ils secturs da litteratura, film e musica.


Sco post da cussegliaziun per bibliotecas ad access public en il chantun promova la biblioteca chantunala il svilup e la coordinaziun da bibliotecas grischunas. Per sustegnair e per sviluppar ils fatgs chantunals da biblioteca serva la cumissiun da biblioteca. Quella consista actualmain da las suandantas commembras e dals suandants commembers: Angelika Luzi-Kaserer, Cinuos-chel, Duri Blumenthal, Degen, Pierluigi Crameri, Li Curt, Petronella Däscher (bibliotecara chantunala), Cuoira, Theres Schlienger (cussegliaziun da biblioteca), Cuoira. 


La biblioteca chantunala è in post da servetsch dal chantun Grischun. Sia incumbensa è fixada en l’ordinaziun davart la biblioteca chantunala dal Grischun.