Zum Seiteninhalt

Dumondas frequentas

Valurs

Valur da nov

La valur da nov correspunda als custs actuals per construir in edifizi dal medem gener, da la medema grondezza e dal medem standard en il medem lieu.

Valur actuala

La valur actuala correspunda a la valur da nov, main la reducziun da la valur ch'è vegnida chaschunada da la vegliadetgna, da l'isada, da l'influenza da l'aura, dals donns da construcziun, da mancanzas da construcziun u per auters motivs.

Valur reala (valur materiala)

La valur materiala sa cumpona da la valur actuala (valur dal stadi) da tut ils stabiliments sin il bain immobigliar, da las lavurs preparatoricas ch'èn necessarias per construir quels, da las lavurs da conturn e dals custs da construcziun accessorics plus la valur dal terren.

Valur da locaziun

Sco valur da locaziun vala il tschains da locaziun senza custs accessorics ch'ins po obtegnair mintga onn per l'utilisaziun da bains immobigliars e da stabiliments architectonics. La valur da locaziun cumpiglia la summa dals retgavs che pon vegnir obtegnids per locals e stabiliments da l'agen diever u dal diever tras terzas persunas.

Valur da l'atgna locaziun

La valur da l'atgna locaziun è la valur da locaziun d'unitads d'utilisaziun (locals) per l'agen diever, pia l'import che pudess vegnir obtegnì en cas d'ina locaziun sut circumstanzas normalas a terzas persunas independentas.

Valur da rendita

La valur da rendita correspunda a la rendita chapitalisada da las valurs da facultad utilisablas. Ella vegn calculada dals retgavs d'edifizis, da surfatschas surbajegiadas e da terren necessari per il manaschi.

valur da rendita = rendita da locaziun netta x 100 : pertschient da chapitalisaziun

Valur commerziala

La valur commerziala correspunda als pretschs da vendita ch'èn vegnids obtegnids per medems u per sumegliants bains immobigliars sut circumstanzas normalas.

Valur fiscala

Per eruir la valur fiscala èn decisivas la valur da rendita e la valur commerziala. La valitaziun da las duas valurs sa drizza tenor la lescha da taglia. La pratica vertenta sa preschenta sco suonda:

Chasas d'abitar, chasas da fatschenta ed abitaziuns d'atgna proprietad:
valur fiscala = (2 x valur da rendita + 1 x valur commerziala) : 3

Lavuratoris e hallas da deposit:
valur fiscala = (valur da rendita + valur commerziala) : 2

Valur dal terren

La valur dal terren correspunda als pretschs da vendita ch'èn vegnids obtegnids per medems u per sumegliants bains immobigliars sut circumstanzas normalas.

Investiziun

Per eruir las valurs ston vegnir inditgadas tut las investiziuns. La differenziaziun tranter augment da la valur e mantegniment da la valur vegn fatga tras l'expert da valitaziun.

Pertschient da chapitalisaziun

Il pertschient da chapitalisaziun è la procentuala, cun la quala la valur da rendita vegn calculada sin basa da la rendita da locaziun netta. El sa cumpona da la tariffa dal tschains da chapital e dals supplements procentuals dals custs per l'administraziun (custs da gestiun, custs da mantegniment, custs d'administraziun, ristga per perditas dal tschains da locaziun, amortisaziuns).

Calculaziun da las cubaturas

La calculaziun da las cubaturas serva ad examinar ils custs da construcziun. Il volumen da l'edifizi vegn eruì en cas d'edifizis novs tenor la norma nr. 416 da la Societad svizra dals inschigners ed architects (SIA). Il volumen d'edifizis pli vegls è eruì ubain tenor SIA nr. 116 ubain nr. 416.

Surfatscha d'abitar netta

La surfatscha d'abitar netta cumpiglia la surfatscha abitabla da tut ils locals interns inclusiv da las stgalas, dal corridor, dals sulers e.u.v. Betg latiers na tutgan las surfatschas da las stgalas externas, dals balcuns, da las terrassas, dals tschalers sco er dals palantschins. En cas da pendenzas dal tetg vegn resguardada la surfatscha a partir d'ina autezza dal local da 150 cm.

Plainpudairs

plainpudair copia da valitaziun / dumonda
plainpudair represchentanza da recurs

Taxas

La taxa che sto vegnir pajada importa minimalmain 150 francs e maximalmain 25 000 francs per mintga bain immobigliar. Per unitads da proprietad en condomini importa la taxa minimalmain 30 francs e maximalmain 25 000 francs.
Per la part da la taxa a partir da 5000 francs vegn concedida ina reducziun da 25 pertschient.

Urden da taxas detaglià: guardar art. 37 OVI.

Metter a quint copias

La lavur administrativa per copiar actas vegn messa a quint. Valair valan las suandantas tariffas:

  • copias da las communicaziuns da stimaziun: 30 francs per bain immobigliar
  • copias dals documents da stimaziun: 50 francs per bain immobigliar
  • copias da documents da l'archiv dal stadi: 80 francs per bain immobigliar

Sch'i vegnan duvrads documents per dapli che trais bains immobigliars, vegn messa a quint mo pli la mesadad a partir dal quart bain immobigliar.

Exempel: documents da stimaziun da 5 bains immobigliars:
3 x fr. 50.– + 2 x fr. 25.– = fr. 200.–

Invista e consegna da las actas

Sin dumonda vegnan consegnadas copias dals documents da stimaziun:

  • a las proprietarias ed als proprietaris sin dumonda a bucca u en scrit; 
  • a las successuras legalas ed als successurs legals (novas proprietarias e novs proprietaris). Ina stimaziun ha in effect giuridic er per las novas proprietarias e per ils novs proprietaris d'in bain immobigliar, uschè ditg che questa disposiziun na vegn betg remplazzada tras ina nova stimaziun.
  • a terzas persunas p.ex. bancas u advocatas ed advocats cunter la preschentaziun d'in plainpudair actual da la proprietaria u dal proprietari.

Meds legals

En la procedura da protesta n'è la correspundenza electronica betg legalmain valaivla. La procedura sto vegnir inoltrà a l'uffizi per la valitaziun d'immobiglias, direcziun da l'uffizi, Hartbertstrasse 10, 7001 Cuira.

Il dretg da far procedura han las proprietarias ed ils proprietaris u – en cas da proprietad en condomini – l'administraziun da tut l'immobiglia, entaifer 30 dis a partir da la communicaziun. Quest termin è fixà en la lescha e na po betg vegnir prolungà. L'acta giuridica sto cuntegnair ina proposta ed ina motivaziun. Ella sto vegnir suttascritta ed inoltrada en la versiun originala cun ils meds da cumprova correspundents. Resguardai per plaschair ch'i dovra – en cas da cumproprietad – las suttascripziuns da la maioritad da las proprietarias e dals proprietaris che represchentan a medem temp la gronda part da la chaussa. En cas d'ina cuminanza d'ertavlas e d'ertavels ston tut las ertavlas ed ils ertavels suttascriver l'acta giuridica ubain dar il plainpudair da far quai a la represchentanza da las ertavlas e dals ertavels.

Sche Vus As laschais represchentar d'ina terza persuna, stuais Vus agiuntar a l'acta giuridica in'autorisaziun da represchentanza suttascritta u in plainpudair suttascrit en la versiun originala.