Cuntegn da la pagina

Politica da finanzas

Impurtanza e princips da la politica da finanzas


La politica da finanzas è ina fatschenta centrala dal departament da finanzas e vischnancas (DFV). Ella n'è betg in'atgna finamira, mabain in med indispensabel per cuntanscher finamiras superiuras da la politica statala ed economica. Ella duai crear bunas premissas per in svilup econimic favuraivel, per il mantegniment d'ina rait sociala suffizienta sco er per la realisaziun d'ina politica progressiva da persunal, furmaziun, energia e traffic.

Las pretensiuns a la politica da finanzas sa laschan ademplir a lunga vista mo sut trais premissas:

  • finanzas dal stadi saunas (gulivaziun a lunga vista tranter las entradas e da las expensas, debits moderads)
  • quota fiscala e statala bassa (dimensiun da las entradas e da las expensas)
  • prestaziuns statalas effizientas (moda e maniera da las entradas e da las expensas)

Las grondas sfidas per la politica da finanzas resultan spezialmain dal svilup dinamic da l'economia e da la populaziun entaifer ed ordaifer il chantun.

En l'artitgel 93 da la constituziun chantunala èn formulads ils princips ils pli impurtants da la politica da finanzas chantunala sco suonda:

Ils meds publics ston vegnir impundids a moda spargnusa, economica ed efficazia.
Las finanzas duain, considerond il svilup economic, esser equilibradas a media vista.
Mintga expensa premetta ina basa legala, in conclus da credit ed ina permissiun da pajament.
Ils custs han da purtar da princip ils chaschunaders.

En la legislaziun davart las finanzas vegnan quests princips descrits pli detagliadamain.

Las mesiras directivas impurtantas per ademplir las pretensiuns da la politica da finanzas èn:

  • da colliar l'elavuraziun dal program da la regenza e la planisaziun da finanzas
  • da colliar l'elavuraziun dal program annual ed dal preventiv annual
  • prescripziuns relevantas dal cussegl grond per il preventiv en furma da conclus concernent il plan da finanzas

Ulteriuras infurmaziuns
Urs Brasser, Tel. 081 / 257 32 12,  urs.brasser@dfg.gr.ch
dr. Amos Pesenti, Tel. 081 / 257 32 18, amos.pesenti@dfg.gr.ch