Cuntegn da la pagina

finanzas

studi da las valurs directivas interchantunala per ils finanzas chantunal da la BAK Economics SA

Resguardond l'incumbensa Kunz (Cuira) concernent l'examinaziun da las incumbensas e da las prestaziuns ch'il cussegl grond ha approvà l'avrigl 2016 sco er en vista al program annual 2017 ha il departament da finanzas e vischnancas (DFV) laschà far in studi da las valurs directivas il settember 2016 da la BAK Economics SA. Per tut ils champs d'incumbensa relevants per las finanzas publicas ha il studi analisà ils custs ed ils chaschunaders da custs en ina cumparegliaziun interchantunala. La moda da proceder e la metodica da la BAK Economics SA èn renconuschidas ed èn gia vegnidas applitgadas en numerus chantuns (tranter auter Berna, Soloturn, Basilea-Citad, Turgovia, Lucerna, Zug, Sutsilvania, Sursilvania, Uri). La finamira dal studi BAK è quella da mussar in potenzial per sbassar ils custs en moda duraivla en champs d'incumbensa definids precisamain. Cun eruir ils uschenumnads custs pro cas èn las cundiziuns structuralas differentas e betg influenzablas dals chantuns vegnidas resguardadas resp. zavradas statisticamain en ils champs d'incumbensa respectivs (correctura per ils custs da structura). Custs pro cas surproporziunals pon en quest connex esser effects d'ineffizienzas eventualas e/u d'in nivel da prestaziun surproporziunalmain aut.


Ils resultats sco tals dal studi eruids sin la basa da l'onn 2014 na pon en quest connex betg vegnir resguardads simplamain sco potenzials da spargn realisabels. Ils custs d'investiziun n'èn betg vegnids registrads. Er las libertads d'agir dal chantun sin il champ legislativ n'èn betg vegnidas resguardadas. Er il svilup ch'è capità dapi l'onn 2014 sto vegnir resguardà en vista a potenzials da spargn. Custs relativamain auts pon avair differents motivs. Qua vali da considerar che custs auts pon senz'auter er correspunder ad ina finamira politica ed esser giustifitgads uschia temporarmain u permanentamain. Malgrà questas restricziuns pon ils resultats servir en l'avegnir sco in agid d'orientaziun supplementar per elavurar mesiras da distgargia concretas.

 

Ulteriuras infurmaziuns
dr. Amos Pesenti, Tel. 081 / 257 32 18, amos.pesenti@dfg.gr.ch