Il Leadership Forum (LSF) è in'occurrenza annuala che tracta temas actuals e sfidas da differents secturs da l'administraziun chantunala e che promova il barat interdisciplinar.
Sut la devisa «Cuminaivlamain per il Grischun» – ch'è la visiun per l'administraziun chantunala e la basa da la Strategia futura da HR – è il LSF25 sa deditgà a l'iniziativa #7 da la Strategia da HR: «Ulteriur svilup da la cultura d'interpresa e da la cumpetenza da manar glieud». La finamira è stada quella da prender las discussiuns ed ils progress dal LSF24 sco punct da partenza per sviluppar vinavant las basas per in concept directiv cuminaivel sco er per valurs cuminaivlas.
En in mund da lavur che sa mida permanentamain èsi decisiv, che l'administraziun chantunala reflecteschia cuntinuadamain, tge valurs e tge tenutas ch'ella vul promover e viver. Il LSF25 ha tractà questa dinamica e dà clers impuls per sviluppar vinavant l'organisaziun.
Retrospectiva sin il Leadership Forum 2025
Suenter il bainvegni uffizial tras il president da la Regenza Marcus Caduff ha Marco Blumenthal, manader da l'Uffizi da persunal, avert l'emprim di cun ina introducziun en la Strategia surordinada da HR ed en la visiun «Cuminaivlamain per il Grischun».
In referat d'impuls inspirant da Lena Effinger (energy factory) ha intermedià energia e perspectivas per concepir il futur. Elements interactivs, sco il giudicament da l'atgna persuna areguard il manar glieud e lavurs en gruppa per reflectar davart las atgnas cumpetenzas da manar glieud, han promovì il barat persunal. A chaschun da l'apero e da la tschaina han las participantas ed ils participants silsuenter pudì approfundar lur discurs.
Il segund di ha cumenzà cun ina curta reflexiun en gruppas pitschnas. Suenter han las participantas ed ils participants lavurà sut la direcziun da Lena Effinger vi da l'ulteriur svilup da valurs cuminaivlas e d'elements da direcziun. En quest connex èn vegnids tematisads aspects centrals per manar glieud en moda efficazia, ed in emprim prototip d'ina chapientscha da valurs cuminaivlas è vegnì preschentà e sviluppà vinavant.
A la fin èn vegnids skizzads ils proxims pass e rimnads impuls persunals da las participantas e dals participants. Suenter il forum vegnan ussa tut las collavuraturas ed ils collavuraturs da l'administraziun chantunala integrads en rundas da dialog per sviluppar vinavant las valurs elavuradas ed il model directiv – cun la finamira da resguardar uschè bleras perspectivas sco pussaivel.
