Lauftext

En il rom da quest sectur spezial porscha l'Uffizi da persunal ils suandants servetschs

Cun grond engaschament garantin nus l'elavuraziun mensila da las pajas per ca. 4200 collavuraturas e collavuraturs da l'administraziun chantunala dal Grischun sco era da las dretgiras chantunalas, da l'Assicuranza d'edifizis dal Grischun, da l'Institut d'assicuranza sociala dal chantun Grischun e da la Cassa da pensiun dal Grischun. Quai cumpiglia la registraziun independenta da mutaziuns che han in effect sin la paja sco era la coordinaziun e la surveglianza da las midadas annunziadas.

Nus elavurain ultra da quai tut las annunzias areguard accidents e malsognas ed essan il post responsabel per l'elavuraziun correcta da las contribuziuns da las assicuranzas socialas. En connex cun dumondas areguard ils rendaquints da paja ed ils attests da paja essan nus l'emprim post da consultaziun per collavuraturas e collavuraturs e lur superiuras resp. superiurs.

Nus sustegnain las spezialistas ed ils spezialists dal controlling en il process annual dal preventiv, la contabilitad correcta sco era la concepziun dals rapports respectivs. La garanzia da la qualitad da las datas, il manar in rapport da persunal cun cleras finamiras sco er il svilup permanent dal sistem da controlla intern tutgan tar nossas incumbensas.