Gestiunar la pestga vul dir tgirar ils peschs e lur spazi da viver cun la finamira da pussibilitar ina pestga attractiva, schebain ch'il term «attractiv» po vegnir interpretà a moda fitg differenta.
Ina gestiun da la pestga equilibrada sa basa sin trais pitgas:
- gestiun dal spazi da viver (tgirar l'abitadi)
- gestiun da la prelevaziun (reglamentar la pestga)
- gestiun da la repopulaziun (repopular ils peschs)
Ina da las incumbensas da l'Uffizi da chatscha e pestga (UCP), determinada en la lescha, è da mantegnair e meglierar la fauna da peschs e ses abitadis e da garantir in diever persistent da l'effectiv cun agid da la pestga. A basa d'in concept da cultivaziun repopulescha l'UCP per quest motiv differentas auas cun peschs.
Manaschi da pestga
La basa per las disposiziuns da pestga vertentas furman la Lescha chantunala da pestga, approvada dal pievel il 2000 ed introducida il 2002, sco era las revisiuns parzialas dals onns 2004 e 2014.
L'UCP sa stenta ultra da quai da concepir la reglamentaziun da la pestga a basa dals fatgs e da chattar in bun equiliber tranter ils interess da la biologia dals peschs, da la protecziun dals animals e da la pestga.
Las prescripziuns davart il manaschi da pestga vegnan perquai controlladas mintga 3 onns ed adattadas en cas da basegn, resguardond ils interess da la basa da las pestgad:ras (propostas deliberadas da las radunanzas da delegad:as), las novas scuvertas a basa d'atgnas retschertgas e da studis externs.
Prescripziuns da pestga
Repopulaziun da peschs
Tenor il concept da cultivaziun actual duain las auas vegnir cultivadas da maniera ch'ellas mantegnan, megliereschan u restabileschan sche pussaivel la diversitad da las spezias natirala e l'effectiv da peschs e giombers indigens, ma era ch'ellas garanteschan ina pestga persistenta. La premissa fundamentala per bunas e saunas populaziuns da peschs èn spazis da viver intacts. Avant che repopular peschs èsi perquai necessari da far tut il pussaivel per meglierar il spazi da viver. En emprima lingia ston ins nizzegiar il potenzial da la reproducziun natirala. Peschs vegnan repopulads mo là, nua che la reproducziun natirala è insuffizienta ed ina pestga persistenta n'è betg garantida. La finamira è damai ina repopulaziun da peschs ecologica che s'adattescha als basegns ed a las relaziuns localas. Ils peschs giuvens necessaris per la repopulaziun vegnan producids en set stabiliments chantunals per l'allevament da peschs. L'overa per la repopulaziun, ma era la basa per allevar ils animals-mamma, deriva per gronda part da peschs selvadis da l'intschess regiunal. Uschia resguarda la repopulaziun da peschs er ils aspects genetics.
Strategia da repopulaziun 2025
Las novas datas davart il success da las mesiras da repopulaziun da peschs (litteratura ed atgnas controllas) ed in'analisa detagliada da las datas da repopulaziun e da pestga dapi l'entschatta da la documentaziun (1969 resp. 2002) han manà a la conclusiun che la strategia da repopular peschs sto vegnir reponderada mintga 5 onns. En lavuratoris ciclics vegn perquai il tema da la repopulaziun da peschs adina puspè reflectà e discutà a moda cuntraversa entaifer l'uffizi, ma era publicamain.
En il decurs da quest process han ins decis da tegnair quint pli fitg dals aspects e da las particularitads da la pestga e da las auas regiunalas. Sper ina strategia da repopulaziun chantunala surordinada che resguarda plitost princips generals, han ins perquai elavurà era set concepts da repopulaziun regiunals.
Igl è stà in giavisch da l'Uffizi da chatscha e pestga (UCP), ma era da las pestgadras e dals pestgaders, da deliberar cuminaivlamain las strategias da repopulaziun regiunalas. Per garantir en l'avegnir il barat tranter l'administraziun e las uniuns da pestga en dumondas da la repopulaziun da peschs regiunala, èn vegnidas installadas dapi il 2015 diversas cumissiuns regiunalas.
Concept da repopulaziun chantunal
Strategia da repopulaziun chantunala 2025
Concepts da repopulaziun regiunals
I Strategia da repopulaziun 2025 Rain Anteriur
II Strategia da repopulaziun 2025 Rain Posteriur, Alvra, Gelgia, Rain Alpin
III Strategia da repopulaziun 2025 Landquart, Landwasser, Alvra
IV Strategia da repopulaziun 2025 En Engiadin'Ota e Maira
V Strategia da repopulaziun 2025 En Engiadina Bassa e Rom
VI Strategia da repopulaziun 2025 Poschiavino
VII Strategia da repopulaziun 2025 Rain Posteriur Valragn, Moesa e Calancasca
Glistas da repopulaziuns
Lais repopulads cun peschs
Flums ed auals repopulads cun peschs