Navigation

Inhaltsbereich

Proximas occurrenzas

 

Mesemna, ils 10 d'avrigl 2024, 08.15 – 12.00 uras, curs «Basas da las acquisiziuns publicas»

 

Situaziun da partenza / descripziun dal seminari

Las acquisiziuns publicas tractan la dumonda, tenor tge reglas e tenor tge princips ch'il maun public cuvra ses basegn da rauba e da servetschs e ch'el surdat incaricas da construcziun. En quest curs emprendais Vus ad enconuscher questas reglas e quests princips en detagl. Ultra da quai vegnan tractads ils instruments introducids cun la revisiun dal dretg d'acquisiziun, sco il dialog u ils contracts generals, sco er la nova cultura da surdada. Quella preferescha aspects da qualitad, da persistenza e d'innovaziun empè dal criteri dal pretsch.


Public en mira
Collavuraturas e collavuraturs da l'administraziun chantunala, da las vischnancas, d'auters purtaders d'incumbensas communalas u chantunalas sco er d'interpresas privatas che procuran per prestaziuns a favur dal maun public en la vita professiunala.


Cuntegn

• Introducziun

• Princips e cundiziuns generalas da las acquisiziuns publicas 

• Andament da la procedura: da la dretga publicaziun fin a la conclusiun dal contract

• Mesiras per enconuscher e per cumbatter cunvegnas da concurrenza

• Novaziuns da la revisiun dal dretg d'acquisiziun

• Runda da dumondas e discussiun

 

Manader
Orlando Nigg, advocat, manader dal Center da cumpetenza per las acquisiziuns publicas e projects, Departament d'infrastructura, energia e mobilitad

 

Liunga dal curs

Tudestg

 

Lieu d'occurrenza

Calvensaal, SVA, Calvenweg, 7000 Cuira

 

Custs

Quest curs è per tut las participantas ed ils participants gratuit.

 

Annunzia

Per mail fin ils 23 da favrer 2024 a weiterbildung@pa.gr.ch

 

___________________________________________________________________________________________________

 

Mesemna, ils 29 da matg 2024, 08.15 – 12.00 uras, curs «Seminari d'approfundaziun acquisiziuns – persistenza ed acquisiziun tenor ils princips da l'economia circulara»

 

Situaziun da partenza / descripziun dal seminari

Il dretg d'acquisiziun che vala en il chantun Grischun dapi il 1. d'october 2022 pretenda da las incumbensadras publicas ina pratica d'acquisiziun pli responsabla e pli persistenta e las adossescha novas obligaziuns per garantir proceduras gistas. Empè d'ina optica d'acquisiziun dominada dal pretsch duain en il futur ils custs dal ciclus da vita sco er ils aspects da persistenza, da qualitad e d'innovaziun star en il center da las surdadas dal maun public. Cun questa nova cultura da surdada po il maun public surpigliar ina funcziun d'exempel areguard ses cumportament da consum e prestar ina contribuziun impurtanta per segirar la bainstanza e la cumpetitivitad sco er per cuntanscher las finamiras fixadas per il clima netto nulla.
In instrument per cuntanscher questas novas finamiras è l'acquisiziun tenor ils princips da l'economia circulara. Quest aspect cumplessiv cuntegna in potenzial considerabel per spargnar las resursas cun gidar a tegnair en funcziun ils products e las materialias sco er cun mantegnair lur valur uschè ditg sco pussaivel. Per quest intent vegnan applitgadas differentas metodas, sco p.ex. models da sharing (p.ex. cooperaziuns da cumpra cun autras vischnancas), duvrar empè da posseder (p.ex. purschidas da «product as a service») u l'acquisiziun da soluziuns da preparaziun e d'ulteriura utilisaziun. En cumbinaziun cun l'applicaziun intelligenta dals criteris controllabels dal svilup persistent, sco p.ex. in label dad SNBS en il sectur da construcziun, contribuescha l'acquisiziun tenor ils princips da l'economia circulara uschia ad ina pratica d'acquisiziun cun responsabladad. A medem temp sa mussan – sin la vart dals offerents – secturs da fatschenta interessants entaifer l'economia circulara per interpresas innovativas da la regiun.
En quest seminari d'approfundaziun emprendais Vus d'enconuscher pli detagliadamain ils princips fundamentals da l'acquisiziun persistenta tenor ils princips da l'economia circulara, tranter auter a maun d'exempels da best practice.

 

Public en mira

Collavuraturas e collavuraturs da l'administraziun chantunala, da las vischnancas, d'auters purtaders d'incumbensas communalas u chantunalas sco er d'interpresas privatas che han gia experientschas en il sectur da las acquisiziuns publicas. Tgi che acquista prestaziuns per il maun public en la vita professiunala da mintgadi e vul sa far in maletg davart il tema innovativ da l'economia circulara, è al dretg lieu en quest seminari.

 

Finamiras da l'instrucziun

Las participantas ed ils participants enconuschan las propostas e las metodas per concepir acquisiziuns en moda persistenta e tenor ils princips da l'economia circulara. Las novas enconuschientschas san ellas ed els integrar en moda utila en las acquisiziuns futuras da lur organisaziun.

 

Cuntegn

• Introducziun en il dretg d'acquisiziun revedì
• Nova cultura da surdada cun focus sin persistenza, qualitad, innovaziun e fairness
• Persistenza en las acquisiziuns – exempel maun public
• Economia circulara en l'acquisiziun publica – introducziun en il concept
• Exempels d'applicaziun d'acquisiziuns tenor ils princips da l'economia circulara en Svizra ed a l'exteriur
• Mia emprima acquisiziun – co proced jau concretamain?
• Runda da dumondas e discussiun

 

Direcziun

Orlando Nigg, advocat, manader dal Center da cumpetenza per las acquisiziuns publicas e projects, Departament d'infrastructura, energia e mobilitad
Antonia Stalder, MAS svilup persistent, mainagestiun Prozirkula, experta per acquisiziuns publicas tenor ils princips da l'economia circulara

 

Lingua dal curs

Tudestg

 

Lieu da l'occurrenza

Calvensaal, Institut d'assicuranza sociala, Calvenweg, 7000 Cuira

 

Custs

Il curs è gratuit per tut las participantas ed ils participants.

 

Annunzia

Per mail fin ils 15 d'avrigl 2024 a weiterbildung@pa.gr.ch

 

 

Documents da scolaziun

Video da scolaziun "Preschentaziun en il nov dretg d'acquisiziun – Acquisiziuns persistentas e cun responsabladad"

Video da scolaziun 

 

Preschentaziun nov dretg d'acquisiziun en il chantun Grischun ‒ Occurrenzas regiunalas avust 2022