Zum Seiteninhalt

Construcziuns novas / Transfurmaziuns

 

L'approvaziun dals plans

L'approvaziun dals plans per manaschis industrials e per manaschis betg industrials cun in privel considerabel da manaschi ha l'intent che las prescripziuns davart la protecziun da la sanadad e davart la segirezza a la plazza da lavur ston vegnir ademplidas gia en la fasa da planisaziun d'in manaschi e betg pir suenter il cumenzament dal manaschi. Mancanzas vi da l'edifizi u vi dals indrizs d'in manaschi che vegnan renconuschidas posteriuramain chaschunan custs supplementars. I sa tracta pia d'in med zunt effizient da la protecziun da la sanadad.

 
Responsabels per inoltrar la dumonda d'approvar ils plans n'èn betg mo la patruna u il patrun, mabain er la patruna u il patrun da construcziun che vul construir u modifitgar in manaschi ch'è suttamess a l'obligaziun d'approvaziun dals plans.
 

La dumonda cun la descripziun (word) sco er cun ils plans da construcziun e cun ils plans d'endrizzament sto vegnir inoltrada en dus exemplars a l'inspecturat da lavur. Quest formular serva a far quai (Lecturas rumantschas e lecturs rumantschs supplitgain nus d'avair chapientscha che nus n'avain betg translatà tut quai che suonda per rumantsch). 
 

Il giudicament dals plans

Nua ch'ina cussegliaziun en il senn da la protecziun da la sanadad e da la segirezza a la plazza da lavur para d'esser cunvegnenta per projects da construcziun e d'indrizs da manaschis betg industrials, giuditgescha l'inspecturat da lavur ils plans. In giudicament dals plans è raschunaivel per manaschis dal mastergn, dal commerzi, da las prestaziuns da servetsch, per administraziuns e per edifizis publics, per ospitals e per chasas da dimora.
 

Sche la patruna u sch'il patrun da construcziun ubain sche l'autura u sche l'autur dal project n'ans ha betg dumandà directamain in giudicament dal project cun consegnar ils plans, ans orientescha l'uffizi chantunal da polizia da fieu davart ils projects da construcziun, per ils quals in giudicament dals plans vegn en dumonda.