Zum Seiteninhalt

Intermediaziun da lavur / Emprest da persunal

L'intermediaziun da lavur privata, l'emprest da persunal (lavur temporara e lavur ad emprest), l'intermediaziun da musicistas e da musicists sco er d'artistas e d'artists e las agenturas da fotomodels e da modellistas èn suttamess a l'obligaziun da dumandar ina permissiun tenor la lescha federala davart l'intermediaziun da lavur e l'emprest da persunal. 
 

Intermediaziun da lavur

Intermediaturas ed intermediaturs èn tenor lescha quellas persunas che uneschan persunas che tschertgan ina plazza e patrunas e patruns per concluder in contract da lavur u per organisar ensemen represchentaziuns artisticas u autras.
 

Emprest da persunal

Sco manaschis d'emprest valan quellas patrunas e quels patruns che surlaschan lur lavurantas e lur lavurants ad in auter manaschi (il manaschi d'engaschament) per prestar la lavur. La furma d'emprest da persunal la pli enconuschenta è la lavur temporara. Ina ulteriura furma d'emprest da persunal è la lavur ad emprest.
 
Per pudair conceder la permissiun d'emprest da persunal, sto il manaschi deponer ina cauziun d'almain 50'000 francs per garantir ils dretgs da salari.
 
Tgi che intermediescha lavur u empresta persunal sapientivamain senza la permissiun necessaria vegn chastià cun ina multa fin 100'000 francs.
 
 
Qua chattais Vus la dumonda da permissiun sco er divers fegls d'infurmaziun e divers documents per l'intermediaziun da lavur privata u per l'emprest da persunal (existan displaschaivlamain mo en tudestg ).
 

Ulteriurs documents, ulteriurs contracts da model ed ulteriuras basas giuridicas chattais Vus qua (existan displaschaivlamain mo en tudestg).
 

La glista dals manaschis d'intermediaziun da lavur e d'emprest da persunal ch'èn permess en Svizra vegn edida dal seco e sa chatta qua (exista displaschaivlamain mo en tudestg).