Cuntegn da la pagina

Cussegliaziun

Per incumbensa da las vischnancas ademplescha l'uffizi dal servetsch social l'incumbensa da l'agid social persunal. Las collavuraturas ed ils collavuraturs dals servetschs socials regiunals adempleschan incumbensas en il sectur da la cussegliaziun persunala e famigliara facultativa e da l'agid social economic.

En connex cun la cussegliaziun e cun l'assistenza da fugitivas e fugitivs, da fugitivas e fugitivs admess provisoricamain sco er da persunas admessas provisoricamain lavuran las collavuraturas ed ils collavuraturs en spezial ensemen cun il post spezialisà per l'integraziun. Il post spezialisà per l'integraziun è responsabel en emprima lingia en il sectur da l'integraziun linguistica e da l'emprima integraziun professiunala. Ils servetschs socials regiunals surpiglian las incumbensas da la garanzia da l'existenza finanziala e da l'integraziun sociala. Latiers tutgan l'agid en dumondas da mintgadi en il sectur d'abitar, da la sanadad, d'assicuranzas, dals fatgs da pajament e da contract, dal temp liber u da scola. Per pudair far questa cussegliaziun dovri savens ina interpreta u in interpret.

Las cussegliaziuns èn gratuitas e confidenzialas.

 

Avais Vus dumondas u problems? Fixai in termin da cussegliaziun. As drizzai per plaschair al servetsch social regiunal da Vossa regiun.

Survista dals servetschs socials regiunals en il chantun Grischun.