Navigaziun principala

Cuntegn da la pagina

L'utilisaziun

Utilisaziun
Utilisaziun
Utilisaziun

Cundiziuns

La biblioteca chantunala è publica ed accessibla a tut las persunas che sa tegnan vi da l’urden da diever. Ulteriuras disposiziuns sa chattan en il reglament da chasa.

La carta da biblioteca dat il dretg d'emprestar medias.

Empustar

L'inventari da la biblioteca chantunala è repartì sin ils lieus al Karlihofplatz e sin il magasin extern al Münzweg. Consultai per plaschair il catalog per vesair il lieu e la signatura.
Cudeschs dals inventaris a liber access al Karlihofplatz ston ins ir a prender sez ed emprestar al spurtegl. Cudeschs dals effectivs dals magasins al Karlihofplatz ed al Münzweg ston vegnir empustads sur noss catalog.

Per ils effectivs dals magasins valan da princip ils suandants termins da furniziun:

Magasin al Karlihofplatz: glindesdi fin venderdi:  entaifer 15 minutas
sonda: entaifer 15 minutas, cun excepziun da las 11.30 fin las 13.15
Magasin extern al Münzweg: glindesdi, mesemna, venderdi: empustaziuns fin a las 10.00 – prontas per retrair a partir da las 13.00

Emprestar

Ils termins d'emprest èn: per medias stampadas 4 emnas, per nonbooks 2 emnas.

Sch'il document n'è betg reservà e sche l'abunament da la biblioteca è valaivel, vegn il termin d'emprest prolungà automaticamain tschintg giadas per mintgamai 4 emnas resp. 2 emnas. Entaifer la durada maximala da l'emprest e da la prolungaziun da 168 dis en cas da medias stampadas e dad 84 dis en cas da nonbooks pon ins er prolungar sez ils termins en il conto da biblioteca. Suenter il temp d'emprest maximal ston ins preschentar il document emprestà a la Biblioteca chantunala ed en cas da basegn emprestar el da nov.

Excepziuns: Documents ch'èn pli vegls che 100 onns, medias che na pon betg vegnir remplazzadas sco er ovras da consultaziun en il sectur a liber access ston vegnir consultads en la biblioteca.

Restituziun

Las medias pon vegnir restituidas al spurtegl d'emprest durant las uras d'avertura. Ordaifer las uras d'avertura stat a disposiziun ina chascha da restituziun sper l'entrada da la biblioteca. Ils documents pon er vegnir tramess enavos per posta. Per la respediziun per posta stat buna l'utilisadra u l'utilisader. Sco data da restituziun vala la data d'entrada en la Biblioteca chantunala.

Per restituziuns retardadas vegnan incassadas taxas d'admoniziun.

Medias dal portal da medias audiovisualas

Il portal da medias audiovisualas inditgescha las medias audiovisualas da la biblioteca chantunala, ma er d'autras instituziuns e da persunas privatas.

Sche la biblioteca chantunala posseda copias digitalas da quests titels, pon els vegnir consultads al lieu, a las staziuns da lavur previsas per quai. Sche la biblioteca chantunala posseda er ils dretgs d'utilisaziun correspundents, pon las medias vegnir consultadas online en il portal da medias audiovisualas.

Per l'emprest e per eventualas preschentaziuns da las ovras dal portal da medias audiovisualas stat a disposiziun in formular. Per sclerir e per dumandar ils dretgs d'utilisaziun è responsabla la clienta sezza u responsabel il client sez.

Conto d'utilisaziun

En il conto d'utilisaziun persunal en il catalog d'uniun pudais Vus far sez las suandantas transacziuns:

  • Prolungar las medias
  • Midar l'adressa
  • Midar il pled-clav

Medias da la biblioteca chantunala ch'èn registradas en il catalog dad EED pon vegnir reservadas u empustadas directamain en il catalog d'uniun.

Currier da velo

Medias da la biblioteca chantunala ch'èn vegnidas empustadas en il catalog d'uniun, pudais Vus laschar furnir gratuitamain a la biblioteca dal center da furmaziun per la sanadad ed ils fatgs socials, da la scola auta da tecnica ed economia, da la scola auta da pedagogia u da la scola auta teologica. Là pudais Vus medemamain restituir Vossas medias da la biblioteca chantunala.

Consultaziun da stampas veglias e da raritads

Da stampas veglias e d'ovras d'ina valur speziala dastgan ins prender invista exclusivamain en la sala da lectura da l'archiv dal stadi e pia sut la surveglianza dal persunal responsabel. Las stampas veglias cumpiglian tut las ovras ch'èn vegnidas edidas avant l'onn 1800.

Las ovras ston vegnir empustadas en la biblioteca chantunala. L'utilisaziun percunter sa drizza tenor las uras d'avertura da l'archiv dal stadi:

Glindesdi, mardi, gievgia

09.00-11.45
13.00-16.45

Mesemna

09.00-17.30

Venderdi

09.00-16.45

Prospects

Vus pudais chargiar ils differents prospects da la biblioteca chantunala en il format PDF sin Voss computer ed als stampar.