Diversas occurrenzas, la scuntrada da la mesemna saira ed in bun dumber da festas sco er d'excursiuns promovan la cuminanza. Per las amaturas ed ils amaturs da la musica stattan a disposiziun sis stanzas da musica, quatter cun in clavazin sco er in local per ina band cun ina battaria. Per quellas e quels che prefereschan da tadlar musica, stat a disposiziun in indriz HiFi en il plaun da divertiment.

Il plaun da divertiment dispona plinavant d'ina schiba da dart, d'in pingpong, d'in fussballin, d'in bigliard, da gieus da cumpagnia (er in schah ed in mulin al liber) e d'intgins canapés per leger u per sa recrear. Las gasettas e las revistas las pli impurtantas en las trais linguas chantunalas stattan a disposiziun. Plinavant dispona il convict da plirs computers che pon vegnir duvrads da las abitantas e dals abitants gratuitamain. En il convict pon ils fans da sport sa mesirar sin in champ cumbinà da miniballape e d'unihockey.

Durant tschertas uras ans stattan a disposiziun ils stabiliments da sport Sand cun las hallas, cun ils prads e cun il local da fitness. Il convict sez dispona medemamain d'in local da fitness bain equipà che po vegnir duvrà pajond ina pitschna summa. Sa chapescha che la commembranza tar uniuns da sport, da cultura u tar autras uniuns a Cuira vegn er sustegnida.

Tgi che preferescha mo da guardar tiers, quella u quel prenda plazza davant ina da las televisiuns. La sortida: Qua vegn per regla promovida l'atgna responsabladad e la transparenza. Las persunas maiorennas survegnan in badge che las permetta durant l'emna access senza restricziuns al convict. Las persunas da 16 fin 18 onns pon dumandar in badge.
A las abitantas ed als abitants sut 16 onns vegni permess dad ir en sortida suenter las 21.00 tenor consultaziun cun ils geniturs.