Navigaziun principala

Cuntegn da la pagina

200 onns Dretg grischun online

  • Erste Mitteilung
  • Neuen Beitrag einfügen

L'Archiv dal stadi dal Grischun (Uffizi da cultura) e la Chanzlia chantunala han digitalisà e publitgà en l'internet l'entir Dretg grischun sco ch'el è cumparì dapi l'onn 1803 en la Collecziun uffiziala da leschas (CUL). Quai facilitescha la lavur giuridica cur ch'i ston vegnir reconstruidas situaziuns giuridicas passadas e metta a medem temp a disposiziun en moda confortabla funtaunas autenticas centralas per perscrutar l'istorgia dal Grischun.


Fin dacurt gieva la versiun chantunala online da la CUL enavos mo fin l'onn 2000. Per ils onns precedents stuevan ins consultar ils toms stampads ed ils ordinaturs a fegls libers (a partir da 1976) da la Collecziun uffiziala da leschas. Da nov stat ussa a disposiziun online l'entira Collecziun uffiziala da leschas.

Differentas pussaivladads d'access digitalas
La Collecziun uffiziala da leschas 1803 – 2000 digitalisada da nov è vegnida rendida accessibla en differentas modas. Las emprimas quatter retschas las pli veglias èn vegnidas digitalisadas tom per tom ed integradas sut lur data da stampa en la Collecziun cronologica da leschas en furma digitala (www.gr-lex.gr.ch). Il tom ch'è vegnì integrà l'ultim è il "Cudesch da dretg grischun" ch'è cumparì l'onn 1959. El è vegnì integrà sut la data da referenza 01-07-1957. Ils relaschs ch'èn vegnids deliberads suenter il 1. da fanadur 1957 n'èn betg pli vegnids integrads en la versiun online da la CUL tom per tom, mabain sco documents singuls. Sco data da referenza è vegnida tschernida mintgamai – sch'ella steva a disposiziun – la data dal conclus.

Tgi che preferescha da lavurar er per ils onns 1958 – 2000 cun ils toms respectivamain cun ils ordinaturs publitgads, po far quai sur la pagina d'internet da l'Archiv dal stadi dal Grischun. En il sistem da tschertga da l'Archiv dal stadi (staatsarchiv-findsystem.gr.ch) stat a disposiziun l'entira CUL 1803 – 2000 en furma da toms.

Ulteriuras infurmaziuns davart la Collecziun uffiziala da leschas ed indicaziuns tecnicas pertutgant las pussaivladads da tschertgar stattan a disposiziun sin la pagina d'internet dal chantun, en il "Impressum" da la Collecziun uffiziala da leschas en furma digitala sco er sin la pagina d'internet da l'Archiv dal stadi dal Grischun.

Agiunta
istorgia da la Collecziun grischuna da leschas


Infurmaziuns:
- Reto Weiss, archivari dal stadi, tel. +41 81 257 28 01, e-mail Reto.Weiss@sag.gr.ch  
- Claudio Schäfer, collavuratur Dretgs politics e publicaziuns, Chanzlia chantunala, tel. +41 81 257 22 24, e-mail Claudio.Schaefer@staka.gr.ch

Gremi: Archiv dal stadi / Chanzlia chantunala
Funtauna: rg Archiv dal stadi / Chanzlia chantunala

Neuer Artikel