L'extensiun da la purschida dad e-voting en il chantun Grischun cuntinuescha. A partir d'immediat pon er las votantas ed ils votants da Cuira, Favugn, Jenaz, Jenins e Tusaun s'annunziar per la votaziun electronica. Persunas interessadas che sa registreschan fin il pli tard ils 5 d'october 2025 tar lur vischnanca, pon votar gia a chaschun da la votaziun dal pievel dals 30 da november 2025 sin via electronica.
Adina dapli persunas cun dretg da votar en il chantun Grischun han la pussaivladad d'utilisar il chanal da votaziun electronic. Dapi ch'ins ha cumenzà l'onn passà cun il manaschi d'emprova dad e-voting, è la purschida vegnida extendida successivamain sin ulteriuras vischnancas. Er a la proxima votaziun dals 28 da settember 2025 pon puspè ulteriuras votantas e votants vuschar per l'emprima giada sin via electronica. Da la partida èn da nov las persunas interessadas en las vischnancas d'Arosa, Grüsch, Maiavilla, Malans, Panaduz, Scharàns, Silvaplauna, Tavau, Tumein, Tumleastga e Valragn. Parallelamain cumenza gia il termin d'annunzia per quellas vischnancas, che dastgan porscher ils 30 da november 2025 per l'emprima giada e-voting.
Adina dapli Grischunas e Grischuns pon far diever dad e-voting
A partir dal november fa la citad da Cuira, pia la vischnanca cun las pli bleras votantas e votants en il chantun Grischun, part dal circul da persunas che voteschan sin via electronica. Perquai dastgass la cumpart da vuschs consegnadas sin via electronica en l'entir chantun s'augmentar cleramain a partir da la votaziun dal pievel dals 30 da november 2025. Ultra da Cuira porschan er las vischnancas da Favugn, Jenaz, Jenins e Tusaun e-voting a lur votantas e votants a partir da la surproxima votaziun.
In'annunzia è pussaivla sur la pagina d'internet dal chantun u da l'atgna vischnanca. Per che l'annunzia possia vegnir resguardada per la proxima votaziun, sto ella vegnir inoltrada il pli tard 8 emnas avant il di da votaziun respectiv. Per la votaziun dal pievel dals 30 da november 2025 scada il termin d'annunzia ils 5 d'october 2025.
En tut las vischnancas grischunas che sa participeschan al e-voting, èn actualmain var 4200 votantas e votants s'annunziads per questa via da votar. Las persunas cun dretg da votar en ina da las vischnancas participantas pon s'annunziar da tut temp sur la pagina d'internet dal chantun u da lur vischnanca.
Ulteriuras infurmaziuns davart il tema e-voting chattais Vus sut www.gr.ch/e-voting ed evoting-info.ch/rm.
Qua vai tar l'annunzia per e-voting en il chantun Grischun: https://www.gr.ch/e-voting/anmelden
Agiunta:
Charta da las vischnancas da pilot
blau stgir: fin ussa | cotschen: a partir dal november 2025
Infurmaziuns:
Daniel Spadin, chancelier, Chanzlia chantunala, tel. +41 81 257 22 21 (cuntanschibel da las 10.00 fin las 12.00), e‑mail Daniel.Spadin@staka.gr.ch
Responsabladad: Chanzlia chantunala