Èsi pussaivel d'inoltrar ina glista sco proposta electorala, sch'ella na cuntegna betg uschè bleras candidatas e candidats sco quai ch'i èn d'occupar sezs en il circul electoral?

Gea. La lescha fixescha mo, che la proposta electorala dastga cuntegnair maximalmain tants nums da persunas elegiblas sco quai ch'i èn d'eleger deputadas e deputads en il circul electoral (art. 8 al. 1 LECG). Percunter dastga ina proposta electorala cuntegnair damain nums che quai ch'i èn d'occupar sezs.

Cura è l'ultim termin per annunziar las propostas electoralas?

Las propostas electoralas ston arrivar tar la cumissiun regiunala cumpetenta per il circul electoral fin il pli tard il 12avel glindesdi avant il di d'elecziun, a las 12.00. Propostas electoralas inoltradas suenter quest termin na vegnan betg resguardadas (art. 11 LECG en cumbinaziun cun l'art. 13 OECG). Per las elecziuns da renovaziun dals 14 da zercladur 2026 ston las propostas electoralas pia esser arrivadas fin il pli tard glindesdi, ils 23 da mars 2026, a las 12.00, tar la cumissiun regiunala cumpetenta per il circul electoral.

Organisescha il chantun ina spediziun da reclama electorala per las glistas che candideschan?

Na. Igl è chaussa da las partidas politicas da s'organisar en quest reguard e da procurar per in'eventuala spediziun coordinada dal material electoral politic.

Po ina partida far dar la vischnanca ils attests d'elegibladad per sias candidatas e ses candidats sco er las attestaziuns dal dretg da votar per las sutsegnadras ed ils sutsegnaders?

Gea. Las attestaziuns dal dretg da votar per las sutsegnadras ed ils sutsegnaders sco er ils attests d'elegibladad per las candidatas ed ils candidats pon vegnir procurads da las partidas tar las administraziuns communalas respectivas. I n'è betg necessari che las persunas pertutgadas ageschian persunalmain.