Mussavia electoral

Per tut las glistas da Voss circul electoral survegnis Vus cedels electorals prestampads sco er in cedel electoral betg prestampà (cedel electoral «vid»). Ils cedels electorals èn liads en furma da bloc (cudeschet dal format A5). Per dar Vossa vusch stgarpais Vus giu il cedel electoral giavischà. Vus dastgais duvrar mo in cedel electoral uffizial prestampà u il cedel electoral «vid» – cedels electorals producids sez èn nunvalaivels.

Emplenir il cedel electoral

Ils cedels electorals prestampads pudais Vus laschar sco ch’els èn u als modifitgar. Sin il cedel electoral «vid» pudais Vus cumbinar libramain las candidatas ed ils candidats.
Il cedel electoral dastga vegnir emplenì e midà mo persunalmain ed a maun.
Las midadas ston esser bain legiblas e cleras.
Per excluder confusiuns duain vegnir scrits si almain il num, il prenum ed il numer da la candidata u dal candidat giavischà.
Cedels electorals che cuntegnan remartgas offendentas u caracterisaziuns evidentas èn nunvalaivels.
Vuschs supplementaras: Sch’in cedel electoral cuntegna lingias vidas, vegnan quellas quintadas sco vuschs supplementaras per la glista ch’è inditgada sin il cedel electoral cun la designaziun da la partida u cun il numer d’ordinaziun.

Cedels electorals utilisabels

Impurtant

Vus dastgais duvrar mo in cedel electoral. Sche Vus mettais dapli ch’in cedel electoral en la cuverta da vuschar, è Vossa vusch nunvalaivla.

Ins declera en moda fitg simpla ch'il cedel electoral sto vegnir emplenì correctamain qua en il video:

Object reference not set to an instance of an object.

Candidatas e candidats elegibels

En il Cussegl grond pon vegnir elegids mo candidatas e candidats che figureschan sin in dals cedels electorals uffizials (glistas) da Voss circul electoral.

Dumber da candidatas e candidats

In cedel electoral na dastga betg cuntegnair dapli nums da candidatas e candidats ch’il dumber da deputadas e deputads ch’èn d’eleger en il circul electoral respectiv (dumber da lingias sin il cedel electoral).
Ina candidata u in candidat dastga figurar maximalmain duas giadas sin il cedel electoral. En circuls electorals cun in sez mo ina giada.
Nums da memia vegnan stritgads dal biro electoral.
Per esser valaivel sto il cedel electoral cuntegnair en mintga cas almain il num d’ina candidata elegibla u d’in candidat elegibel.