In spazi per dumondas, quitads e novas vias: Dapi curt datti a la scola St. Catharina a Cazas ina nova purschida per giuvenils cun istorgia da migraziun – in'ura da consultaziun averta, manada da Meron Tekie per incumbensa dal Post spezialisà per l'integraziun dal Grischun. Quai che tuna simpel, ha in grond effect: I sa tracta d'esser preschent, tadlar e dar orientaziun e curaschi als giuvenils.

«Ils giuvenils dovran oravant tut ina chaussa: clerezza», di Meron Tekie. En lur ura da consultaziun sa scuntran las scolaras ed ils scolars tranter 16 e 21 onns cun ina persuna da contact fidada. Tut dastga vegnir tematisà – problems dal mintgadi, dumondas davart la scolaziun u temas fitg persunals. La finamira: chattar cuminaivlamain soluziuns u mussar ils proxims pass. «Jau na poss betg adina porscher sezza la soluziun, ma jau poss tadlar, intermediar e mussar vias», declera Meron Tekie. Gia il sentiment da vegnir prendì serius ha savens in effect rinforzant.

L'istorgia dal svilup da l'ura da consultaziun mussa, quant impurtanta che la purschida è: Adina puspè vegnivan ils giavischs dals giuvenils drizzads a las scolas u als alloschis – omadus posts savens betg responsabels. Quai ha chaschunà frustraziun e malsegirezza. Il Post spezialisà per l'integraziun ha vesì questa largia – ensemen cun la scola è vegnì lantschà il project da pilot. Dapi lura sa mussa: Il basegn è grond, la resonanza positiva. «Sch'ils giuvenils ma vesan sin la plazza da pausa, vegnan els spontanamain tar mai. Quai ma mussa, quant fitg che questa purschida vegn duvrada», uschia Tekie.

Il spectrum dals temas è grond – da dumondas davart la scolaziun fin a biografias fitg persunalas. En quest connex dat en egl: Giuvenils cun in nivel da tudestg pli aut han plitgunsch dumondas davart l'integraziun professiunala. Sch'il nivel linguistic è bass, stattan percunter dumondas dal mintgadi en il center. En il center stat en mintga cas la basa dal discurs: la confidenza. «Jau hai grond respect envers ils giuvenils che s'avran – savens sa tracti da temas ch'els han gia menziunà en auters lieus, che n'èn dentant mai vegnids persequitads vinavant.»

L'ura da consultaziun è concepida sapientivamain en moda nunbirocratica: nagina annunzia, nagina birocrazia – simplamain al lieu, directamain en scola. Questa vischinanza fa che bler è pussaivel. La preschientscha da Meron Tekie è ina clav: ella è visibla, fidada ed ins po discurrer cun ella. En ils discurs rinforza ella ils giuvenils er da scuvrir atgnas resursas, da reflectar e da surpigliar responsabladad per lur proxims pass.
Sche e co ch'i va vinavant suenter la fasa da pilot, è avert. Ma ina chaussa è clera: L'ura da consultaziun serra ina largia impurtanta en il sistem d'accumpagnament – ella è dapli ch'ina purschida. Ella è in segn per l'integraziun vivida cun cor, structura ed obligaziun.

«Ils giuvenils han uschè bler potenzial. Mintgatant ston ins mo esser pront da tadlar per far bler effect.»

Meron Tekie, Post spezialisà per l’integraziun