Cuntegn da la pagina

Promoziun da las premissas da furmaziun linguisticas e da scola per giuvenils e per giuvens creschids immigrads tard

En il chantun Grischun sco er en tut la Svizra crescha l'immigraziun da persunas da 16 fin 25 onns, er pervia da l'augment dal dumber da dumondas d'asil. Questas persunas derivan da blers differents pajais. Ils stadis da derivanza ils pli frequents èn actualmain l'Eritrea, l'Afganistan, il Portugal, la Germania e l'Italia.

Cuntrari a persunas senza scolaziun postobligatorica han persunas cun ina furmaziun professiunala schanzas cleramain pli grondas d'avair success sin il martgà da lavur e da manar ina vita senza esser dependentas da l'agid social. Quai vala er per las persunas estras che vivan en Svizra. Perquai han tant l'economia publica, la politica sociala sco er la politica da furmaziun in interess che giuvenils, ch'èn immigrads tard e che n'han betg terminà en Svizra il temp da scola obligatoric, hajan la qualificaziun da scola e la qualificaziun professiunala. Quai premetta ch'els survegnian access a purschidas transitoricas correspundentas ed a sistems da la furmaziun professiunala e ch'els sajan sezs motivads da furnir las prestaziuns necessarias.

La situaziun da partenza dals giuvenils immigrads tard è fitg eterogena en quai che reguarda lur basa da furmaziun e lur cumpetenzas linguisticas. Per entrar en las structuras regularas da la furmaziun professiunala dovri d'ina vart savida da basa da scola, en spezial en ils roms tudestg e matematica, da l'autra vart er cumpetenzas persunalas sco tecnicas d'emprender e da lavurar, l'abilitad da s'organisar u strategias per schliar problems. Per che las persunas immigradas tard possian serrar las largias linguisticas e da scola ed elavurar las premissas per sa participar al sistem da la furmaziun professiunala, dovri ina purschida da furmaziun simpla, en il senn d'in apportader a las purschidas da las structuras regularas.