Zum Seiteninhalt

Infurmaziuns per interprendidras e per interprendiders

Blers manaschis en il chantun Grischun occupan collavuraturas e collavuraturs da differents pajais e da differentas culturas e procuran per lur integraziun en differenta moda e maniera, per exempel cun:

  • integrar ellas ed els en la cultura dal manaschi
  • promover l'acquisiziun da la lingua locala
  • sustegnair furmaziuns supplementaras internas ed externas
  • sustegnair pussaivladads da qualificaziun ed il prender suenter in diplom professiunal
  • intermediar activamain infurmaziuns davart la muntada e l'impurtanza d'emprender la lingua locala, da s'integrar en la societad sco er davart la furmaziun professiunala e la furmaziun supplementara en Svizra

Interpresas che promovan l'integraziun da lur collavuraturas e da lur collavuraturs esters prestan ina contribuziun essenziala per tut la societad e profiteschan per lur manaschi en blers reguards, tranter auter:

  • cun garantir la communicaziun e la chapientscha
  • cun simplifitgar process interns
  • d'ina cuntentientscha pli gronda da las collavuraturas e dals collavuraturs
  • d'ina meglieraziun dal clima da manaschi
  • d'ina loialitad pli gronda per l'interpresa

CTA – dialog d'integraziun cun il mund da lavur

Il discurs d'integraziun cun las federaziuns economicas sco er cun ulteriurs partenaris da dialog ch'è vegnì lantschà l'october 2012 da la conferenza tripartita davart las aglomeraziuns (CTA) ha la finamira da promover il success tar l'integraziun da lavurantas e da lavurants esters sin basa d'ina collavuraziun rinforzada ed intenziunada dal stadi e da l'economia.

Sin la pagina d'internet www.dialog-integration.ch chattais Vus infurmaziuns actualas davart projects currents sco er ina collecziun da good practices, infurmaziuns da basa e generalas, glistas da controlla e diversas adressas da posts da cussegliaziun e d'infurmaziun.

Curs da lingua e purschidas d'integraziun per Vossas collavuraturas e Voss collavuraturs

Vus tschertgais in curs da lingua per Vossa collavuratura u per Voss collavuratur u al vulais render attent a purschidas d'integraziun existentas? Ina survista dals curs da lingua che vegnan purschids en il chantun e da las purschidas d'integraziun dal Grischun chattais Vus sut la rubrica "Kurse/Angebote".

Infurmaziuns quotidianas en 17 linguas

Vus vulais sustegnair Vossa collavuratura u Voss collavuratur immigrà ch'el po s'orientar uschè svelt sco pussaivel en ses novs conturns da viver e tschertgais infurmaziuns davart la vita e davart la lavur en Svizra. Sur il spurtegl online pon patrunas e patruns empustar gratuitamain la broschura chantunala da bainvegni per lur collavuraturas e collavuraturs che sa tiran natiers. Ella cuntegna infurmaziuns impurtantas davart secturs tematics ils pli differents e stat a disposiziun en 17 linguas.