L'access a las archivalias è sa midada fitg ils ultims onns. Pervia da quai èn ils instruments da retschertga ch'èn il resultat da l'inventarisaziun e registraziun la clav per l'utilisaziun, disponibels en differentas furmas.
Las archivalias che vegnan inventarisadas da nov (per part er en moda retroactiva) registrescha l'archiv dal stadi en in
instrument da retschertga online (CMI STAR) .
Auters instruments da retschertga stattan mo a disposiziun en la sala da lectura da l'archiv dal stadi u èn disponibels online sco document da PDF (d'enconuscher sco PDF en las survistas da las archivalias).
Ina survista dals instrument da retschertga che stat a disposiziun per tge archivalias vegn dada tar las survistas da las archivalias (vesair qua sutvart). Las cundiziuns per utilisar las archivalias chattais Vus sut il chapitel
Utilisaziun.
Retschertga en las survistas da las archivalias :
Las archivalias da l'archiv dal stadi vegnan divididas en moda generala en las suandantas gruppas:
Infurmaziuns detagliadas tge cuntegn e tge temp che las differentas archivaziuns cuvran, chattais Vus tar las differentas gruppas ed en questa instrucziun curta.
Las survistas vegnan preschentadas sco tabella e cuntegnan las suandantas colonnas:
- Descripziun
Descripziun curta dal cuntegn da las archivalias.
- Signatura
Signatura da las archivalias: quella è impurtanta per il persunal da l'archiv, uschia che las archivalias pon vegnir messas a disposiziun en moda svelta e facila.
- Instruments da retschertga PDF
Link sin l'instrument da retschertga da las archivalias, quel vegn mess a disposiziun sco PDF. Per il format da PDF duvrais Vus l'Acrobat Reader. Quel pudais Vus chargiar giu qua..
- Instrument da retschertga online
Link sin l'instrument da retschertga online STAR (infurmaziuns davart STAR, vesair qua sutvart).
- HLS / LIR
Link sin il lexicon istoric da la Svizra, il pli infurmaziuns biograficas (per part per rumantsch).
Sch'i n'è betg avant maun in'endataziun, n'èn las archivalias anc betg cataloghisadas electronicamain e l'instrument da retschertga sa chatta en la sala da lectura da l'archiv dal stadi.
Retschertga en il STAR
L'archiv dal stadi dal Grischun cataloghisescha sias archivalias dapi passa 10 onns cun la software d'archiv CMI STAR. La finamira è da porscher in med da tschertga che permetta a las utilisadras ed als utilisaders da retschertgar en moda simpla en tut las archivalias ch'èn cataloghisadas electronicamain.
Las indicaziuns davart las archivalias vegnan endatadas en differents champs dal program. Uschia èsi pussaivel da tschertgar cumadaivlamain da chasa anor ils secturs d'interess. Igl èn dentant avant maun mo las descripziuns da las archivalias, ils documents sezs ston vegnir consultads en l'archiv dal stadi.
Vus avais differentas pussaivladads per tschertgar archivalias: u cun la navigaziun en la tectonica da l'archiv u cun la funcziun da tschertga.
Ina instrucziun curta davart la tschertga en il program da l'archiv CMI STAR chattais Vus sut quest link.
Retschertga en il portal da l'archiv
Dapi l'onn 2011 è l'archiv dal stadi dal Grischun affilià ad Archives online. En quest connex sa tracti d'in portal che permetta da retschertgar rauba da l'archiv en differents archivs svizzers. En Archives online vegnan rendidas accessiblas cun ina mascra da retschertga las metadatas ed ils documents che derivan da las bancas da datas dals archivs ch'èn affiliads e ch'èn accessibels al public. Il spezial vi da Archives online è che las utilisadras ed ils utilisaders pon retschertgar cun ina suletta dumonda a medem temp en plirs archivs.
Ina instrucziun curta davart la tschertga en il portal da l'archiv chattais Vus sut quest link.
Retschertga en la biblioteca da preschientscha
En la biblioteca da preschientscha da l'archiv dal stadi dal Grischun chattan ins ils mediums ils pli impurtants per la perscrutaziun da l'istorgia dal Grischun e per la genealogia sco er ovras da funtauna e da consultaziun.
La biblioteca da preschientscha sa chatta en la sala da lectura ed è cataloghisada tras ina tezlera e tras il catalog da biblioteca Aleph.
Ils mediums da la biblioteca da preschientscha pon vegnir consultads mo en la sala da lectura, in emprest n'è betg pussaivel.
Il catalog da biblioteca Aleph è ina part da l'uniun da bibliotecas dal Grischun. Ils cudeschs da l'archiv dal stadi figureschan en la glista dals resultats en la colonna "Effectiv". Cun il filter èsi er pussaivel da tschertgar sistematicamain mediums mo da l'archiv dal stadi.
Ina instrucziun curta davart l'utilisaziun dal catalog da biblioteca Aleph chattais Vus sut quest link.
Ina instrucziun detagliada da l'uniun da bibliotecas dal Grischun chattais Vus sut Agid.