Retschertgas
Skript-Editor
Retschertgar en ils instruments da retschertga da l'Archiv dal stadi
Tschertscha locala
Tschertga locala - en tudestg
(sin la pagina d'internet da l'archiv dal stadi inclusiv instruments da retschertga da PDF)
Co chat jau archivalias?
En l'Archiv dal stadi dal Grischun datti duas pussaivladads d'access per tschertgar online archivalias:
- il sistem d'infurmaziun d'archiv (banca da datas da l’archiv)
- ils instruments da retschertga da PDF sin la pagina d'internet.
Tant il sistem d'infurmaziun d'archiv sco er ils instruments da retschertga da PDF cuntegnan la cumpletta infurmaziun da cataloghisaziun davart las archivalias dal Archiv dal stadi dal Grischun. La cataloghisaziun dals differents inventaris è dentant differentamain intensiva; per part fitg detagliada, per part mo en furma da survistas. Betg mintga document davart in lieu u in tema è descrit singul. Er sch'ina tschertga na proveda nagins resultats, pon documents esser avant maun. Ponderaziuns sistematicas davart en tge inventaris ch'ins pudess chattar documents davart in tema d'interess, mainan vinavant. Ultra da quai pon las retschertgas vegnir cumplettadas tras dumondas e tras visitas d'archivs.
Las archivalias sezzas n'èn per la gronda part betg accessiblas online e ston vegnir consultadas en la sala da lectura da l'Archiv dal stadi. Ils inventaris gia disponibels online per sistem d'infurmaziun d'archiv èn endatads en ina glista separada.
Las pussaivladads e las cundiziuns da l'utilisaziun da las archivalias chattan ins qua.
Sistem d'informaziun d'archiv (banca da datas da l'archiv)
Il sistem d'infurmaziun d'archiv è il sistem da retschertga central. Novas registraziuns vegnan mo pli fatgas en il sistem d'infurmaziun d'archiv. Ils instruments da retschertga pli vegls sin palpiri èn per gronda part vegnids endatads da nov en quest sistem. Sch'ina nova endataziun na pareva betg dad esser raschunaivla, è l'instrument da retschertga respectiv vegnì digitalisà ed integrà en il sistem d'infurmaziun d'archiv en furma d'object digital da PDF. Il sistem d'infurmaziun d'archiv cuntegna pia en differentas furmas tut ils instruments da retschertga avant maun.
Sur il sistem d'infurmaziun d'archiv pon las archivalias vegnir empustadas directamain per l'invista en la sala da lectura.
Instruments da retschertga da PDF
In ulteriur access a nossas archivalias porschan ils instruments da retschertga che stattan a disposiziun sco PDF sin nossa pagina d'internet per invista e che pon vegnir chargiads giu da là. Er en questa furma stattan a disposiziun online quasi tut las infurmaziuns d'index da nossas archivalias. Uschespert ch'in inventari è vegnì registrà da nov en il sistem d'infurmaziun d'archiv, vegn fatg in cudesch da tschertga da PDF resp. in med da tschertga da PDF respectiv. Exceptads da quai èn in pèr inventaris che creschan savens e permanentamain. En quests cas èn propi actualas mo las indicaziuns en il sistem d'infurmaziun d'archiv.
Fin l'onn 2012 èn ils instruments da retschertga er vegnids stampads sin palpiri. Ils instruments da retschertga sin palpiri ch'èn avant maun pon vegnir consultads vinavant en la sala da lectura da l'Archiv dal stadi. Questa collecziun na vegn dentant betg cuntinuada.
Structura da l'inventari da l'Archiv dal stadi
Las cundiziuns per utilisar las archivalias chattais Vus sut il chapitel "Utilisaziun".
Infurmaziuns detagliadas davart il cuntegn e davart la perioda ch'ils inventaris tractan, chattais Vus tar las singulas partiziuns.
Ina glista speziala Inventaris digitalisads [link] inditgescha ils inventaris gia digitalisads ed utilisabels online.
Retschertgas en la biblioteca da l'archiv dal stadi
La biblioteca da l'archiv dal stadi dal Grischun sustegna la lavur cun las archivalias. I sa tracta d'ina da las bibliotecas las pli cumplessivas per l'istorgia dal Grischun. Savens chattan ins gia en la litteratura qua avant maun respostas a dumondas da gener istoric. Ultra da litteratura istorica èn disponibels er ils stampats uffizials chantunals.
L'inventari da la biblioteca da l'archiv dal stadi è integrà er en il catalog da
l'uniun da bibliotecas dal Grischun. La tschertga en il catalog mussa resultats da tut las bibliotecas affiliadas. Ina retschertga exclusivamain en l'inventari da la biblioteca da l'archiv dal stadi è pussaivla sur la "tschertga extendida".
La biblioteca da l'archiv dal stadi è ina biblioteca da preschientscha; las medias disponiblas pon vegnir consultadas mo en la sala da lectura, i n'è betg pussaivel d'emprestar quellas.