Restai al current
L'administraziun chantunala dal Grischun promova il perfecziunament intern e sustegna il perfecziunament extern.
Cun rinforzar las cumpetenzas-clav garantin nus l'ulteriur svilup persunal, social, metodic e professiunal da nossas collavuraturas e noss collavuraturs. Il mantegniment e l'extensiun da las qualificaziuns ans permettan d'ina vart da segirar la qualitad da nossa lavur. Da l'autra vart ans qualifitgescha la furmaziun cuntinuada da satisfar a las pretensiuns dal mund da lavur che sa midan cuntinuadamain.
Mesiras on-the-job
Quantitativ: cuntegns da lavur pli vasts tras l'amplificaziun da la lavur.
Qualitativ: extensiun da la responsabladad e d'incumbensas pli cumplexas.
Mesiras off-the-job
Perfecziunament intern (program da curs communabel)
Ils accents dal program da perfecziunament intern vegnan mess sin l'intermediaziun interdepartamentala da know how relevant.
Dapli infurmaziuns davart ils curs chattais Vus en il program da curs actual.
Perfecziunament extern (individual)
Sch'i na vegn purschì en il rom dal program da curs nagina furmaziun supplementara che correspunda als basegns da l'administraziun e da las collavuraturas e dals collavuraturs, sustegna l'administraziun chantunala dal Grischun la frequentaziun da scolaziuns e perfecziunaments specifics externs. Tut tenor l'interess dal manaschi sustegna il patrun la furmaziun supplementara finanzialmain u temporalmain.
Academia (sistem da management d'emprender basà sin computer)
Tscherts curs pon nossas collavuraturas e noss collavuraturs absolver cun agid dad e-learning.
En cas da dumondas generalas davart il perfecziunament As drizzai per plaschair a l'Uffizi da persunal dal Grischun.
En il rom da quest sectur spezial porscha l'Uffizi da persunal ils suandants servetschs
Nus organisain ina purschida da perfecziunament interna attractiva e garantin la realisaziun dals curs. Expertas ed experts interns sco era spezialistas e spezialists externs concepeschan las scolaziuns orientadas a la pratica. Ultra da quai elavurain nus las dumondas per perfecziunaments individuals da las collavuraturas e dals collavuraturs dal Chantun.
Da nossas purschidas da perfecziunament profiteschan tut las collavuraturas e tut ils collavuraturs dals differents posts da servetsch da l'administraziun chantunala dal Grischun, da las dretgiras chantunalas, da l'Assicuranza d'edifizis dal Grischun, da l'Institut d'assicuranza sociala dal chantun Grischun sco era da la Cassa da pensiun dal Grischun.
Sch'i dat plazzas libras, pon era persunas d'ordaifer s'annunziar per ils curs purschids. Interessentas ed interessents externs sa drizzan per plaschair directamain a l'Uffizi da persunal dal Grischun.