Projects actuals
Ingio Via – Nua vas, tschierv?
Ensemen cun il Parc Naziunal Svizzer (PNS) eruescha l'Uffizi da chatscha e pestga ils moviments migratorics dals tschiervs en il spazi dal PNS. L'emprima part dal project cun il titel «Ingio Via 1» è gia terminada. La segunda part «Ingio Via 2» è lantschada.
En connex cun quest project realisescha il PNS diversas occurrenzas. Dapli infurmaziuns chattais Vus sur questa colliaziun: Ingio Via – Nua vas, tschierv?
Rapports dal project
Guaud e selvaschina
Per giuditgar a lunga vista la situaziun dals donns da selvaschina e planisar las mesiras per meglierar la situaziun datti in uschenumnà concept davart il guaud e la selvaschina. Il chantun Grischun elavura per quest intent rapports regiunals davart la relaziun tranter il guaud e la selvaschina. Dapi l'onn 2018 vegnan examinads e revedids ils rapports elavurads ils onns 2003 fin 2012. Ils novs rapports chattais Vus sin la pagina-web da l'Uffizi da guaud e privels da la natira.
Emetturs per ils tschiervs en il Reticon
L'onn 1990 ha l'Institut per la perscrutaziun d'animals selvadis e da l'ecologia a l'Universitad da Vienna (FIWI) preschentà ils resultats da sias perscrutaziuns davart il guaud e la selvaschina en il territori dal Reticon. En ils trais pajais participads èn quels vegnids realisads a moda differenta en la pratica. En il fratemp ha il FIWI s'acquistà autas cumpetenzas en il sectur da la registraziun da la selvaschina cun agid d'emetturs. Grazia a las novas metodas scientificamain fundadas ha el pudì respunder a dumondas ch'eran fin uss avertas.
Il project da marcar ils tschiervs en la regiun da cunfin dals trais pajais ha inizià la gruppa districtuala da las chatschadras e dals chatschaders da Bludenz en il Vorarlberg sut l'egida da Lothar Tomaselli da l'uffizi da chatscha districtual. Il project è vegnì lantschà il fanadur 2009 ensemen cun l'Uffizi da chatscha e pestga dal Grischun e l'Uffizi per ambient dal Principadi dal Liechtenstein. La direcziun scientifica ha surpiglià il FIWI a Vienna.
Broschura davart la marcaziun dals tschiervs
Rapport final dal project en il Reticon part A
Rapport final dal project en il Reticon part B