Il nov edifizi cumplementar al Münzweg a Cuira è il punct final da la renovaziun totala da la scola chantunala grischuna. L'edifizi nov garantescha in'orientaziun persistenta da questa instituziun chantunala da furmaziun, ademplind a medem temp il standard d'ina scola media. La construcziun da la mensa e da la mediateca cumplettescha las infrastructuras da la scola chantunala Halde e da la chasa Cleric. Dapi l'onn 2006 vegnan quellas sanadas architectonicamain en pass parzials ed adattadas areguard il manaschi. Plinavant è vegnì creà il spazi che vegn duvrà urgentamain per la protecziun dals bains culturals.

Lieu d'inscunter – tut sut in tetg
La nova plazza è ideala: per la mediateca sco lieu central per sa procurar infurmaziuns e per la mensa sco lieu da dimora e d'alimentaziun. Grazia a sia vischinanza cun la stgala da colliaziun sa chatta l'edifizi nov en in lieu central da las vias vi e nà da la scola chantunala Halde, da la chasa Cleric e dal tract da biologia sco er dal stabiliment da sport Sand.
Per ina scolaziun progressiva è indispensabla ina plattafurma d'infurmaziun e da barat cun ina mediateca moderna. La nova mediateca gida a preparar las scolaras ed ils scolars da la scola chantunala grischuna per il mintgadi en in'universitad. Ella permetta l'access a las novas medias digitalas e stgaffescha l'ambient ideal per il studi autodidactic da litteratura spezialisada, da la lavur cun funtaunas sco er da la confruntaziun scientifica cun tematicas cumplexas. En quests locals passentan las scolaras ed ils scolars er regularmain il temp senza instrucziun e quests locals èn er ils lieus da scuntrada natirals per tut la cuminanza dal campus.

Nov edifizi modern
L'edifizi nov è vegnì construì tenor Minergie-P-ECO e collià – ensemen cun il stabiliment da sport Sand – cun la rait da chalur a distanza. El posseda in tetg plat, nua ch'è installà in implant da fotovoltaica. Quest implant producescha in retgav annual da current da bundant 77 000 uras da kilowatt; quai correspunda a l'energia da circa 19 chasadas. Precedì las lavurs da construcziun ha la demontascha da l'anteriura chasa da scola da Rudolf Steiner sco er las exchavaziuns d'in onn dal servetsch archeologic dal Grischun. Là han ins scuvrì l'istorgia da passa 400 onns da la chasa.
Grazia a l'engaschi ed a la buna collavuraziun tranter il patrun da construcziun, ils planisaders, ils interprendiders e la citad da Cuira han pudì vegnir realisadas cun success las finamiras dal project areguard la qualitad, areguard ils custs ed areguard ils termins. Ils custs budgetads da 27 milliuns francs per il nov edifizi cumplementar cun mensa, mediateca e locals per la protecziun dals bains culturals han pudì vegnir observads. L'uffizi federal da protecziun da la populaziun UFPP sa participescha cun in import da 640 000 francs als custs da construcziun dals locals per la protecziun dals bains culturals.