A chaschun dal di interchantunal dals parents che tgiran dals 30 d’october di l’Uffizi da sanadad dal Grischun GRAZIA, ensemn cun differentas organisaziun spezialisadas che s’engaschan mintga di cun corp ed olma per lur parents malsauns u disgraziads. Era quest onn vulessan nus exprimer nossa engraziaivladad.

En il rom dal di dals parents che tgiran planisescha il chantun differentas acziuns.

Grazia fitg parents! In messadi da las cusseglieras guvernativas e dals cussegliers guvernativs

Lain prender il temp per ils parents che tgiran! 

En Svizra è mintga quarta persuna in parent u ina parenta che tgira. Quest engaschament è da gronda valur ed impurtant, e quai betg mo per la persuna tgirada, mabain era per la societad. Il di interchantunal dals parents che tgiran ils 30 d’october è ina da las bleras occasiuns da dir grazia e da s’infurmar.

Lain prender temp per ils parents che tgiran e tadlain tge ch’els din. Als envidain ad in té u in café, als sustegnain ed als regalain renconuschientscha. Pensain che mintgin e mintgina sa duvrar in di agid u daventar in parent che tgira.

Il 2023 s’engaschan diesch chantuns cun ina allianza interchantunala per parents che tgiran. Nus ans giavischain ch’era auters chantuns mobiliseschan e ch’ils 30 d’october daventa en avegnir in di naziunal per parents che tgiran. Gidar ed agir munta era d’enconuscher e promover levgiament e sustegn per parents che tgiran. Las autoritads sin nivel federal e chantunal lavuran londervi.

Nus tuts enconuschain en noss conturn in(a) parent(a) che tgira u nus accumpagnain sezs ina persuna ch’è limitada en sia sanadad ed autonomia. Per restar saun e per mantegnair ina vita sociala ed in activitad professiunala, èsi impurtant che parents che tgiran n’emblidan betg lur agens basegns. Cun simpels gests savais Vus mussar Voss sustegn persunal per parents che tgiran e contribuir uschia che quest di survegn l’impurtanza ch’el merita.

Nus quintain cun Vus e schain #gratiaparents

Las cusseglieras guvernativas ed ils cussegliers guvernativs: Rebecca Ruiz (VD), Thierry Apothéloz (GE), Philippe Demierre (FR), Laurent Kurth (NE), Mathias Reynard (VS), Nathalie Barthoulot (JU), Raffaele De Rosa (TI), Pierre Alain Schnegg (BE), Peter Peyer (GR), Lukas Engelberger (BS)   

Ulteriuras infurmaziuns davart la campagna interchantunala chattais Vus sin: betreuende-angehoerige-tag.ch