Il Cussegl federal ha decis da transfurmar l’obligatori da homeoffice per manaschis che fan regularmain tests davent dals 31 da matg 2021 en ina recumandaziun. Uschia pon collavuraturas e collavuraturs en manaschis che sa participeschan als tests da manaschis en il Grischun puspè lavurar davent da questa data en lur plaz da lavur regular.

Test emnils ed obligaziun da purtar mascrinas

La participaziun als tests resta per las collavuraturas ed ils collavuraturs voluntaria. Nus As supplitgain dentant da motivar Voss persunal da far in test almain ina giada per emna. Per plaschair era segirar che las reglas d’igiena e da distanza vegnian resguardadas. Tar quellas tutga era l’obligaziun da purtar mascrinas – tala vala era, sche Vossas collavuraturas e Voss collavuraturs fan regularmain tests. I sto vegnir purtà ina mascrina en il cas che dapli ch’ina persuna è preschenta en ina stanza, quai era sche la distanza po vegnir tegnida (per exempel en biros cun spazi avert). Ulteriuras infurmaziuns chattais Vus sin la pagina-web da l’Uffizi federal da sanadad publica (UFSP).

Persunas vaccinadas e guaridas

Il svilup concernent las vaccinaziuns è fitg legraivel. Collavuraturas e collavuraturs cumplettamain vaccinads (duas dosas da vaccinaziun u ina dosa da vaccinaziun suenter avair varghentà la malsogna) na duain betg pli far part als tests repetitivs. Persunas che han patì da Covid-19 duain pir sis mais suenter la malsogna puspè far regularmain tests. Sch’i vegn testà pli baud, pon fauss resultats positivs esser la consequenza.