Ensemen cunter corona
Qua chattais Vus ina rimnada da dumondas e respostas frequentas en connex cun ils tests successivs da corona en differentas vischnancas.
Avant il test
Quant custa il test?
Il test è gratuit.
Tgi po laschar far il test?
Tuts! Er giasts sco er abitantas ed abitants d'autras vischnancas e regiuns èn envidads da laschar far il test gratuit. Recumandada vegn ina vegliadetgna minimala da 6 onns. Persunas minorennas ston vegnir accumpagnadas d'in genitur u ston prender cun sai la decleraziun da consentiment emplenida.
Ma stoss jau annunziar?
Gea. Per pudair garantir in andament uschè effizient sco pussaivel e per evitar temps da spetga èsi necessari che Vus As annunzias.
Co poss jau m'annunziar?
In'annunzia per telefon n'è displaschaivlamain betg pussaivla. Vus pudais dentant er vegnir al test senza annunzia!
Poss jau annullar u midar mes termin?
Ni l'in ni l'auter. Fixai simplamain in auter termin u vegni senza annunzia al test.
Duvrais Vus agid per l'annunzia?
Vus pudais er annunziar autras persunas, sco per exempel commembras e commembers da la famiglia. N'avais Vus nagin che As po gidar tar l'annunzia? As drizzai en quest cas per plaschair a la hotline sut 081 254 16 00.
È il test obligatoric?
Na, la participaziun è voluntara. Ma mintga participaziun gida a franar il virus.
Tgi fa ils tests?
Ils tests vegnan fatgs da persunal medicinal spezialisà. Las reglas da distanza e d'igiena vegnan observadas en mintga cas.
Tge tip da test vegn fatg?
I vegn fatg in test svelt d'antigens. L'emprova vegn prendida cun agid d'in sfrusch dal nas e da la gula.
Tge stoss jau prender cun mai per il test?
Vus stuais prender cun Vus ina carta d'identitad valaivla u in passaport valaivel ed il code (code QR) che Vus avais survegnì cun la conferma da Vossa annunzia. Quel code po vegnir mussà sin il smartphone u en moda stampada sin palpiri.
Quant ditg dura il test?
L'entira procedura al lieu dura var 15 minutas. Grazia a l'annunzia èsi pussaivel da planisar l'andament e da realisar el senza incaps. Vus na stuais betg spetgar al lieu sin il resultat dal test. Suenter circa 30 minutas survegnis Vus in SMS cun Voss resultat dal test.
Dacurt è mes test sin il coronavirus stà negativ. Duai jau tuttina ma participar a l'acziun da test?
Gea. In test è adina ina registraziun da la situaziun mumentana. I po bain esser ch'il resultat da Voss test avant dus dis è stà negativ, schebain che Vus avevas il virus gia en Vus. Sch'in test vegn fatg memia baud, poi numnadamain esser ch'ils virus na pon gnanc vegnir cumprovads. Pia pudessas Vus esser oz contagiusa u contagius e derasar il virus. Cun in ulteriur test survegnis Vus tschertezza en chaussa e protegis uschia Vus sezza u Vus sez e potenzialmain Voss conumans.
Jau ma protegel gia ussa strictamain cun distanza, cun l'igiena dals mauns, cun mascrina, cun l'app SwissCovid e.u.v. – pertge ma duai jau tuttina participar a l'acziun da test?
Pertge ch'i na dat mai ina segirezza da tschient pertschient. Malgrà tut las mesiras da protecziun che Vus observais, exista ina ristga restanta che Vus sajas As infectada u infectà cun il virus SARS-CoV-2. Sche Vus As participais a l'acziun da test, vegnis Vus a savair, sche Vus purtais il virus en Vus – uschia pudais Vus proteger Vus sezza u Vus sez e potenzialmain er Voss conumans cunter la malsogna da COVID-19.
Tge èsi, sche jau vuless anc spustar il termin per il test suenter l'annunzia?
As drizzai per plaschair a la hotline sut 081 254 16 00 (08.00 – 18.00). Nus chattain segiramain in nov termin per Vus.
Jau sun actualmain en la quarantina ordinada, dastg jau tuttina ir a far il test?
Gea. Quai è giavischabel. Observai per plaschair las reglas d'igiena e da distanza e purtai ina mascrina, cur che Vus bandunais la chasa fin che Vus essas puspè e chasa.
Jau vuless ma participar a l'acziun da test, stoss dentant lavurar durant quels trais dis. Poss jau laschar far il test durant mes temp da lavur?
Tenor il dretg vertent sto Vossa patruna u Voss patrun As permetter dad ir a laschar far il test, sche Vus vulais quai. Schebain il temp per il test vala per Vus sco temp da lavur pajà u sco temp liber, vegn decidì da Vossa patruna u da Voss patrun – il meglier contactais Vus Vossa patruna u Voss patrun uschè svelt sco pussaivel.
Durant il test
Tge èsi, sche jau hai sintoms d'in dafraid u d'ina chaussa sumeglianta al termin dal test?
L'acziun da test è organisada e coordinada uschia che Vus n'avais quasi nagin temp da spetga e quasi nagin contact cun autras persunas. Sche Vus observais strictamain las mesiras da protecziun vertentas (purtar ina mascrina, tegnair distanza, dischinfectar ils mauns), pudais Vus participar a l'acziun da test er cun sintoms da malsogna. Il persunal al lieu è engraziaivel, sche Vus al rendais attent a Voss sintoms, per ch'i possian eventualmain vegnir prendidas mesiras da protecziun anc pli severas per Voss test al lieu.
Quant grond è il privel che jau m'infectesch cun il coronavirus a chaschun dal test?
Nua che persunas potenzialmain infectadas sa scuntran cun persunas saunas, è ina infecziun cun il virus da COVID-19 teoreticamain pussaivla. Tar l'acziun da test observan tuts strictamain las mesiras da protecziun vertentas (purtar ina mascrina, tegnair distanza, dischinfectar ils mauns). Ultra da quai stuais Vus As registrar online avant il test, uschia che la populaziun arriva successivamain al test ed i na sa furman naginas gruppas da persunas al lieu. Uschia sa reducescha la ristga da s'infectar ad in minimum. Ina ristga restanta na po betg vegnir exclusa, ma ella è – en vista a l'organisaziun ed a las mesiras da protecziun prendidas – fitg, fitg pitschna.
Ma poss jau er laschar testar cun ina prelevaziun da sang, sche jau na vi betg far quel sfrusch dal nas e da la gula dischagreabel?
Quai n'è displaschaivlamain betg pussaivel tar nossa acziun da test. Tests svelts sin antigens vegnan fatgs sco standard cun il sfrusch dal nas e da la gula.
Vegn jau gist vaccinà cunter corona a chaschun dal test?
Tar l'acziun da test da mez december vegnan fatgs mo tests svelts sin antigens. Cun il sfrusch dal nas e da la gula vegni cumprovà, sch'il virus SARS-CoV-2 (meglier enconuschent sco coronavirus) è avant maun. Vaccins che protegian cunter ina infecziun cun quest virus n'èn anc betg admess en Svizra. Pervia da quai na po nagin sa laschar vaccinar tar l'acziun da test.
Poss jau gist ma laschar vaccinar voluntarmain a chaschun dal test?
Na, entant ch'in vaccin cunter COVID-19 n'è betg admess uffizialmain da l'Institut svizzer per products terapeutics Swissmedic, na po nagin laschar sa vaccinar cunter COVID-19.
Suenter il test
Tge far, sche jau sun positiv?
Er en quest cas survegnis Vus il resultat per SMS. Ultra da quai survegnis Vus ina infurmaziun da nus, tge che l'isolaziun vul dir e tge mesiras che Vus stuais observar.
Tge far, sche jau sun negativ?
Il test svelt mussa la situaziun mumentana. Sche Vus avessas da survegnir sintoms pli tard, As annunziai tar Vossa media u tar Voss medi. Observai en mintga cas vinavant las mesiras dal UFSP: purtar ina mascrina, tegnair distanza e dischinfectar ils mauns.
Tge duai jau far, sch'il resultat da mes test è nunvalaivel?
Quai poi dar en paucs cas. Vus dastgais vegnir anc ina giada en in lieu da test u repeter Voss test tar ina media u in medi da Vossa tscherna. Preschentai il SMS cun il resultat da Voss test. Alura vegn er il segund test ad esser gratuit.
Cura e co survegn jau mes code covid per l'app SwissCovid?
Quel survegnis Vus glindesdi, ils 14 da december 2020, automaticamain per SMS.
Tanscha il test sco conferma per viadis en pajais che pretendan tar l’entrada en lur pajais in test negativ?
Quai po variar tut tenor pajais e sto vegnir eruì tar il pajais correspundent.
Survegnan ins anc a scrit ina conferma pli detagliada dal resultat da test?
Na, il resultat da test via SMS è la suletta conferma che Vus retschavais.
Sin l'areal èn segiramain persunas che han il coronavirus en sai. Stoss jau ir 10 dis en quarantina pervia da quai suenter il test?
Quai n'avess betg da capitar, perquai che tut il persunal e tut las persunas testadas observan strictamain las mesiras da protecziun vertentas (purtar ina mascrina, tegnair distanza, dischinfectar ils mauns) e perquai ch'i na dat mai – grazia als termins individuals – gruppas pli grondas da persunas, cur ch'il test vegn fatg. Uschia pudais Vus partir dal fatg che Vus na stuais betg ir pauschalmain en quarantina, perquai che Vus essas stada preschenta u stà preschent a l'acziun da test.
Tge èsi, sche jau sun sauna u saun, ma m'infectesch cun il coronavirus sin l'areal da test?
Quest scenari è fitg pauc probabel grazia a las mesiras da protecziun severas. Sch'il resultat da Voss test avess dad esser positiv – independentamain, sche quai è vegnì constatà a l'acziun da test u en cas d'in test pli tard – valan per Vus las mesiras da l'isolaziun ordinada.
Sch'il resultat da mes test è positiv e jau vom en isolaziun – tge è alura cun las persunas, cun las qualas jau aveva contact ils ultims dis?
Circa 30 minutas suenter il test survegnis Vus in SMS cun il resultat da Voss test. Sch'il resultat da Voss test sin il coronavirus SARS-CoV-2 avess dad esser positiv, survegnis Vus da nus ina infurmaziun, tge che l'isolaziun vul dir e tge mesiras che Vus e Voss conturns ston observar. Da princip vali, sco tar tut las malsognas da COVID-19 registradas: persunas cun in resultat positiv dal test ston sa render en isolaziun, las persunas, cun las qualas ellas han gì stretgs contacts, durant 10 disen quarantina.
Auter che tar ils tests regulars sin il coronavirus na vegnan Voss stretgs contacts dals ultims dis betg contactads dal contact tracing chantunal en il rom da questa acziun da test. Questas persunas ston sa render sezzas en quarantina.
Pertge na vegn la quarantina da mias persunas da contact betg controllada dal contact tracing, tar ils auters tests sin il coronavirus bain?
Sch'il resultat da Voss test sin il coronavirus avess dad esser positiv, ston tut las persunas, cun las qualas Vus avais gì stretgs contacts, sa render en quarantina da 10 dis. Questa directiva è lianta, independentamain da la dumonda, sche Vossa infecziun è vegnida constatada tar questa acziun da test u eventualmain en cas d'in test sin il coronavirus tar Vossa media u Voss media da chasa. En il rom da questa acziun da test na pudain nus però betg anc giuditgar, quants tests che mussan resultats positivs. Pervia da quai na pudain nus betg garantir cun segirezza, ch'il contact tracing chantunal possia contactar tut las persunas che ston sa render en quarantina. En quest connex appellain nus al senn da responsabladad da las persunas testadas e da lur contacts.
Sche la gronda part da la populaziun vegn testada a chaschun da l'acziun da test e sche mes resultat è negativ, poss jau alura ma mover libramain senza mascrina ed uschia? Las persunas cun in resultat positiv vegnan gea zavradas e ston restar a chasa.
Tgi che survegn in resultat positiv tar l'acziun da test, sto sa render silsuenter en isolaziun. Uschia pudain nus franar il virus ed esser in zic pli lucs en vista a las festas da Nadal, perquai ch'il dumber da cas e l'occupaziun dals ospitals vegnan ad esser regressivs. Regressiv na vul però betg dir nulla – quai na fiss gnanc pussaivel en in temp uschè curt. E quai signifitga da l'autra vart che tut las persunas, da las qualas il test ha mussà in resultat negativ, observan per plaschair vinavant las mesiras da protecziun: purtar ina mascrina, tegnair distanza, dischinfectar ils mauns.
Vegn jau survegliada u surveglià da las autoritads suenter il test?
Dal test fatg fin a la communicaziun dal resultat stuessas Vus renunziar a stretgs contacts, fin che Vus avais survegnì il resultat da Voss test. Quai n'avess betg da durar dapli che 30 minutas. Durant quest temp appellain nus a l'atgna responsabladad da mintga singula e da mintga singul. Nus ans legrain che Vus gidais er da concepir questa acziun da test per tuts en moda uschè libra da ristgas sco pussaivel.
Ussa questa acziun da test, suonda suenter la surveglianza totala u il sforz da sa vaccinar?
Ina finamira declerada da questa acziun da test è quella da rimnar experientschas per stgaffir uschia las premissas per far – sche quai fa da basegn (ulteriur u nov augment dal dumber da cas) – ulteriurs tests en tut il chantun Grischun. En quest connex sa basa tut sin voluntariadad: Nagin na vegn sfurzà da sa participar a l'acziun da test u sto temair dischavantatgs, sch'el na sa participescha betg a questa acziun. Vi da quest caracter da princip voluntar da l'acziun na vegn a sa midar nagut er, sche talas acziuns vegnissan realisadas anc ina giada en il futur.
Jau hai gist terminà mia isolaziun. Sch'il resultat da mes test è ussa positiv, stoss jau tuttina ir en isolaziun?
Na. Sche Vus avais fatg tras la malsogna, vegni actualmain fatg quint che Vus hajas ina immunitad da circa 3 mais. Durant 3 mais na stuais Vus pia As render ni en isolaziun ni en quarantina, sche Vus avais fatg tras la malsogna dal coronavirus ch'è vegnida confermada d'in labor.
Finanzas e perdita da gudogn
Tgi paja la perdita da gudogn?
Isolaziun: Vossa perdita da gudogn vegn liquidada sur l’assicuranza da diarias da l’interpresa. Vus essas scritta malsauna u scrit malsaun per 10 dis.
Quarantina: Sco persunas da contact en quarantina vegn Vossa perdita da gudogn indemnisada a Vus, respectivamain a Vossa patruna u a Voss patrun, sur l’urden da cumpensaziun dal gudogn. Tut las infurmaziuns en chaussa chattais Vus sin la pagina d’internet da l’Institut d’assicuranza sociala dal Grischun (IAS) www.sva.gr.ch.
Quant custa tut questa acziun da test?
Igl è difficil da quantifitgar ils custs precis da questa emprima acziun da test regiunala. Il dat in concept per ina tala acziun da test en tut il chantun Grischun, per la quala fissan previs ca. 5 milliuns francs. Questa acziun da test en tschertas regiuns dal Grischun dal sid custa correspundentamain main.
Na fissi meglier d'impunder tut las resursas finanzialas e persunalas per questa acziun da test (cun in niz dubitaivel) en auters secturs, tar ils quals ins sa gia ussa che las resursas vegnan propi duvradas là?
Natiralmain è questa acziun da test in'expensa supplementara per il chantun per ina curta perioda, quai è in fatg. Ma quests daners èn investids fitg bain: Cun questa acziun stgaffin nus supplementarmain las premissas per far en cas da basegn (ulteriur u nov augment dal dumber da cas) ulteriurs tests en tut il chantun Grischun. E talas acziuns da test èn sut il stritg ina varianta bler pli favuraivla per dumagnar la pandemia che ulteriurs lockdowns, cun ils quals vegn chaschunà in donn economic considerabel.
Senn ed intent da l'acziun da test
Tgi ha ordinà questa acziun da test?
La Regenza grischuna sco part da ses conclus concernent la strategia generala per in concept da protecziun per il Grischun, protocol nr. 1018/2020 dals 2 da december 2020.
Pertge vegnan fatgs quests tests precis en mia vischnanca?
Las regiuns Malögia ed Engiadina Bassa/Val Müstair èn regiuns turisticas grondas ed en la regiun Bernina èn l'ultim vegnids registrads blers cas, en spezial er en las instituziuns da sanadad. Pervia da quai ha la Regenza grischuna decidì che tut la populaziun da las regiuns menziunadas vegnia testada sin basa voluntara en il rom da questa acziun da test.
Pertge na vegn questa acziun da test betg fatga en tut il Grischun u en tut la Svizra?
Questa acziun da test è l'emprima da ses gener en tut la Svizra. Manar tras questa acziun l'emprima giada en in territori anc pli grond sco p.ex. en l'entir chantun Grischun u schizunt en l'entira Svizra, fiss collià cun lavur e cun custs sproporziunads. Cun questa acziun stgaffin nus supplementarmain las premissas per far en cas da basegn (ulteriur u nov augment dal dumber da cas) ulteriurs tests en tut il chantun Grischun.
Tge porta insumma ina tala acziun da test?
Cun questa acziun da test vulessan nus d'ina vart tegnair quint dal dumber da cas creschent, da l'autra vart sperain nus da survegnir uschia in maletg da la situaziun mumentana dal dumber da cas da las persunas asintomaticas per pudair prender mesiras intenziunadas. Tras quai pudess la situaziun sa mitigiar signifitgantamain en vista als dis da Nadal e da Bumaun, quai ch'è actualmain in grond giavisch da la populaziun e da nus tuts.
Tge gida questa acziun da test insumma, sch'ella è voluntara? U sfurzar u laschar senza, tuts u nagin!
In sforz da far in test cuntrafaschess a la tenuta da basa da l'Uffizi federal da sanadad publica UFSP d'appellar fermamain a l'atgna responsabladad da mintgina e da mintgin en il cumbat cunter la pandemia e da lavurar cun restricziuns uschè minimalas sco pussaivel. Ultra da quai na fiss in sforz da far in test giuridicamain betg pussaivel. Fin ussa ha la populaziun gidà bain a realisar las mesiras ed è sa mussada fitg solidarica, pervia da quai avain nus buna speranza che bleras persunas vegnian a sa participar a questa acziun da test.
La Regenza grischuna punctuescha adina puspè che la rata da positivitad stoppia vegnir reducida. Questa acziun da test n'è bain betg buna da cuntanscher quai.
Dapli persunas che laschan far in test e dapli tests che han in resultat negativ e pli bassa che la rata da positivitad è. Pervia da quai partin nus dal fatg che questa acziun da test vegn a sbassar effectivamain la rata da positivitad. Ma i pudess er esser che la rata da positivitad s'augmenta per in curt temp en il rom da questa acziun da test, sche nunspetgadamain blers tests èn positivs tar questa acziun. Il pli tard cur che las persunas cun in resultat positiv dal test termineschan lur isolaziun, duess la rata da positivitad puspè sa reducir cleramain fin Nadal, uschia ch'i na vegn betg ad esser necessari da prender mesiras da protecziun pli severas per ils firads.
En las medias hai adina puspè num che quests tests mussian relativamain savens resultats fauss. Alura na gida questa acziun da test bain nagut?
Definitivamain po quai vegnir giuditgà mo en la retrospectiva. Nus faschain questa acziun da test mo en tschertas parts dal Grischun per rimnar experientschas en vista a la strategia da tests extendida che vegn elavurada per il mument. En il cas ideal badain nus in pèr dis suenter l'acziun da test ch'il dumber da cas sa reducescha cleramain. Pia ans pudessan nus legrar d'in Nadal e d'in Bumaun cun main stress che quai ch'els chaschunan cun las restricziuns che valan actualmain.
Dapli tests mussan dapli cas registrads – n'è questa acziun da test betg simplamain in motiv per chattar dapli cas per avair in motiv da serrar tut sur Nadal?
Effectivamain vegn questa acziun da test bain a chaschunar in augment dal dumber da cas en il chantun Grischun per in curt temp. Ma sche uschè bleras persunas sco pussaivel laschan far in test e sa rendan en isolaziun en cas d'in resultat positiv, duess il dumber da cas puspè sa reducir cleramain fin Nadal, uschia ch'i na fissan betg necessarias mesiras da protecziun pli severas sur ils firads. Anzi, ils firads fissan alura potenzialmain pli patgifics che sut las restricziuns che valan actualmain.
Ussa ha il Cussegl federal decidì da vulair permetter la fenotipisaziun ed extender uschia las analisas dal DNA. Ed ussa vegn questa acziun da test. Vegn qua simplamain rimnà DNA sco material da test per la fenotipisaziun?
Suenter in test svelt sin antigens sin basa d'in sfrusch dal nas e da la gula sa chatta però effectivamain Voss DNA sin il bastunet da test, ma el na vegn ni rimnà ni elavurà en x-ina moda e maniera. Suenter il sfrusch vegn l'emprova prendida mo analisada, sch'i po vegnir constatada ina infecziun cun il coronavirus SARS-CoV-2. Suenter vegn ella destruida.
Na stuess questa acziun da test betg vegnir repetida mintga 14 dis per ch'ella haja insumma in senn? Forsa m'infectesch jau simplamain in, dus dis suenter l'acziun da test, l'infecziun na vegn betg scuvrida e l'acziun da test è stada per il giat.
Questa acziun da test è natiralmain ina registraziun da la situaziun mumentana e n'As garantescha betg che Vus na sajas betg As infectada u infectà curt avant u curt suenter il test cun il coronavirus e che Vus n'al possias betg derasar correspundentamain. Pervia da quai èsi indispensabel che Vus observias vinavant las mesiras da protecziun vertentas (purtar ina mascrina, tegnair distanza, dischinfectar ils mauns) er independentamain da questa acziun da test – e che Vus giajas a far in test sin il coronavirus, sche Vus avais sintoms d'in dafraid u d'ina grippa. La finamira dal chantun è quella, d'elavurar uschè svelt sco pussaivel in concept per in test periodic sistematic – questa acziun da test è in emprim pass en questa direcziun
Na fissi betg pli raschunaivel da testar obligatoricamain tut las turistas e tut ils turists, directamain suenter ch'els èn arrivads en la regiun?
Questa acziun da test per la populaziun è in emprim pass en direcziun d'ina strategia da test extendida en il chantun Grischun. Che tut las turistas e tut ils turists vegnian eventualmain testads tar lur arriv en il chantun, è er l'object da las discussiuns e pudess eventualmain daventar ina part da la strategia da test extendida – actualmain na fiss quai insumma betg realisabel. Ils tests svelts sin antigens sin basa d'in sfrusch dal nas e da la gula ston vegnir fatgs da persunal medicinal spezialisà, e nus n'avain per il mument ni la pussaivladad persunala ni logistica da pudair porscher tals tests di e notg per las turistas ed ils turists che arrivan en il chantun.
Pertge na datti talas acziuns da test betg mintga onn durant l'unda da grippa?
Quai è ina dumonda dals custs e dal success. En cas da COVID-19 avain nus da far cun ina pandemia d'ina enorma dimensiun che strapatscha noss sistem da sanadad bler pli ferm che l'unda da grippa annuala. Pervia da quai èsi en noss egls raschunaivel da far ussa ina tala acziun da test. En il cas ideal resultan da quai enconuschientschas per eventualas acziuns da test futuras per grippas, ma quai n'è betg il senn e l'intent primar da questa acziun. En il center stat ussa il fatg da chattar uschè bleras pazientas ed uschè blers pazients asintomatics sco pussaivel che han il coronavirus per isolar ellas ed els, per pudair schanegiar noss sistem da sanadad uschia che nus possian passentar in temp da Nadal pli u main patgific.
Talas acziuns da test n'èn bain betg ina moda e maniera per sbassar il dumber da cas – uschia s'augmentan las cifras gea!
Effectivamain vegn questa acziun da test bain a chaschunar in augment dal dumber da cas en il chantun Grischun per in curt temp. Ma sche uschè bleras persunas sco pussaivel laschan far in test e sa rendan en isolaziun en cas d'in resultat positiv, duess il dumber da cas puspè sa reducir cleramain fin Nadal, uschia ch'i na fissan betg necessarias mesiras da protecziun pli severas sur ils firads. Anzi, ils firads fissan alura potenzialmain pli patgifics che sut las restricziuns che valan actualmain.
Protecziun da datas
Tge datas vegnan rimnadas a chaschun dal test?
Tar l'annunzia vegnan registradas in pèr da Vossas coordinatas sco p.ex. Voss numer da telefon e Vossa adressa dad e-mail, per che nus As possian contactar suenter ch'il test è fatg per communitgar Voss resultat. Tar il test sez vegni mo analisà, sch'il coronavirus SARS-CoV-2 po vegnir cumprovà en Voss sfrusch u betg. La decleraziun precisa davart la protecziun da datas cun tut ils detagls chattais Vus sut Decleraziun davart la protecziun da datas.
Che jau stoss dar p.ex. mes numer da telefon per il test, per che jau possia vegnir contactà – okay. Ma pertge èsi relevant per questa acziun da test, tge schlattaina che jau hai? Na vegnan qua betg rimnadas datas nunnecessarias?
Tar il test registrain nus mo las datas ch'èn absolutamain necessarias, per As pudair identifitgar senza dubis. Vossas datas persunalas sco er il resultat dal test vegnan elavurads per l'analisa epidemiologica. La decleraziun precisa davart la protecziun da datas cun tut ils detagls chattais Vus sut Decleraziun davart la protecziun da datas.
Tge capita cun mias datas suenter il test?
Las datas persunalas codadas sco er il resultat dal test vegnan stizzads or da la plattafurma da test sin il coronavirus, che vegn duvrada per administrar ils tests svelts, il pli tard suenter 2 emnas, cur che l'intent d'elavuraziun è ademplì. La decleraziun precisa davart la protecziun da datas cun tut ils detagls chattais Vus sut Decleraziun davart la protecziun da datas.
Tge capita, sche jau na vi betg inditgar mias datas tar il test? Poss jau alura tuttina laschar far il test?
Displaschaivlamain betg. L'acziun da test è bain regiunala ed organisada dal chantun Grischun, ma ella è suttamessa a las directivas federalas concernent l'analisa epidemiologica. Perquai che COVID-19 è ina malsogna che suttastat a l'obligaziun d'annunzia, stuain nus registrar Vossas datas persunalas per il test. Vus pudais pretender da tut temp infurmaziuns davart Vossas datas persunalas che vegnan elavuradas. La decleraziun precisa davart la protecziun da datas cun tut ils detagls chattais Vus sut Decleraziun davart la protecziun da datas.