Cuntegn da la pagina

Protecziun da l'uffant

Mintga persuna po sa drizzar a la APUC, sche a ses avis uffants èn periclitads e dovran eventualmain agid uffizial. Autoritads, uffizis, dretgiras, persunas spezialisadas dals secturs medischina, tgira, furmaziun, educaziun, assistenza, cussegliaziun sociala e religiun che survegnan – exequind lur professiun – enconuschientscha dal fatg ch'in uffant è periclità da commetter acts da violenza cunter terzas persunas u cunter sasez, èn obligadas d'annunziar questa periclitaziun. La APUC fa ils scleriments necessaris e decida, sch'igl è necessari da prender mesiras per proteger l'uffant.

Instrucziun

Nua ch'igl è necessari po la APUC dar tschertas instrucziuns per la tgira, per l'educaziun u per la scolaziun e designar ina persuna u in post adattà che ha il dretg da prender invista e da survegnir infurmaziuns.

Constituziun d'ina curatella

Sch'ils scleriments mussan ch'ils geniturs èn surdumandads cun l'educaziun e cun la tgira da lur uffant, nominescha la APUC ina procuratura u in procuratur per l'uffant, e quai per proteger l'uffant e per sustegnair ils geniturs. Questa procuratura u quest procuratur sustegna ils geniturs cun pled e fatg en lur tgira per l'uffant ed integrescha posts spezialisads là, nua che quai fa da basegn.

En cas da conflicts pertutgant la regulaziun dals contacts persunals po vegnir constituida ina curatella che ha l'incarica da survegliar ch'ils contacts persunals vegnian exequids, d'intermediar en cas da conflicts e da determinar las modalitads dals contacts da visita integrond tut las parts participadas.

Retratga dal dretg da decider davart il lieu da dimora (retratga dal quità)

Sch'ins na po betg far frunt ad ina periclitaziun seriusa da l'uffant en autra moda, sto la APUC retrair dals geniturs il dretg da decider davart il lieu da dimora e plazzar l'uffant en in lieu adattà, p.ex. en ina famiglia da tgira u eventualmain en ina instituziun adattada.

Retratga da la tgira genituriala

Sche l'ulteriura periclitaziun da l'uffant na po betg vegnir evitada suffizientamain, p.ex. perquai ch'ils geniturs èn permanentamain absents, na s'occupan insumma betg pli da l'uffant, ageschan en moda insistenta e gravanta cunter ils interess da l'uffant u saboteschan las stentas da la mandataria u dal mandatari, examinescha la APUC ina retratga da la tgira genituriala e la nominaziun d'ina avugada u d'in avugà per l'uffant.