Navigation

Inhaltsbereich

eBBV
 
Il UST realisescha il project per introducir la procedura electronica per la permissiun da construcziun en il chantun Grischun. La finamira è quella da simplifitgar e d'accelerar fermamain il process da permissiun cun agid d'ina plattafurma electronica, quai davent da l'inoltraziun da la dumonda fin a la communicaziun da la decisiun.

Process pli simpels e pli svelts per requirents/-as ed uffizis

En il futur na duai la procedura betg vegnir liquidada cun numerus formulars sin palpiri – sco quai ch'ella vegn fatga oz – mabain sin via digitala. Las persunas petentas – patruns da construcziun u architectas ed architects – registreschan la dumonda da construcziun en la plattafurma d'internet dal chantun. Tut ils uffizis communals e chantunals cumpetents survegnan access al dossier digital per giuditgar da lur vart las dumondas e per prender decisiuns coordinadas.

News

Zercladur 2022: La procedura electronica per la permissiun da construcziun (ePPC) s'avanza │ Proxima fasa: submissiun
Dapi ils 17 da zercladur 2022 è publitgada la submissiun per sviluppar il sistem dad IT per il project ePPC. Il catalog d'exigenzas per quest sistem d'informatica pretensius è vegnì elavurà en collavuraziun cun tut las vischnancas grischunas e cun ils posts chantunals spezialisads. Per quest intent èn vegnids realisads numerus lavuratoris e discurs individuals cun las vischnancas e cun ils posts spezialisads. Ultra da quai èn vegnids elavurads emprims prototips dal sistem. Quels èn vegnids testads cun las represchentantas ed ils represchentants dals circuls d'utilisadras e d'utilisaders. Ils documents stattan a disposiziun sin il Sistem d'infurmaziun davart las acquisiziuns publicas en Svizra (www.simap.ch). La ePPC duai vegnir messa en funcziun la primavaira 2024.

Mars 2022: Baugesuche sollen künftig digital eingereicht werden können | suedostschweiz.ch

Urari dal project

  • Fin mez 2022: Fasa da concept: scleriment e concepziun dals andaments da procedura necessaris, cumpetenzas, pass da process, puncts da contact, aspects giuridics e.u.v.; process da cooperaziun per resguardar las pretensiuns ed ils basegns da tut las acturas ed ils acturs relevants; determinaziun da las pretensiuns tecnicas a la plattafurma electronica
  • Fin l'atun 2022: Submissiun e preparaziun da la decisiun da surdada per il project dad IT che serva a sviluppar la plattafurma electronica
  • Fin mez 2023: Realisaziun dal project dad IT: realisaziun da la plattafurma electronica e dals puncts da contact cun las softwares per administrar fatschentas dals uffizis communals e chantunals
  • A partir da l'atun 2023: Realisaziun da las mesiras d'introducziun
  • A partir da la primavaira 2024: Metter en funcziun la plattafurma electronica ePPC

Moda da funcziun da la ePPC

Grazia a questa liquidaziun digitala daventa la procedura per la permissiun da construcziun bler pli simpla per tut las acturas ed ils acturs participads: Il sistem gida las persunas petentas gia a chaschun da la registraziun da las dumondas da construcziun, cun las manar tras il process, cun las porscher agid e cun emplenir automaticamain las infurmaziuns pertutgant la dumonda, ch'èn gia enconuschentas (p.ex. datas dal SIG u dal REA). Suenter pon tut ils uffizis cumpetents elavurar parallelamain la dumonda en il program d'internet u eventualmain en la software administrativa existenta, senza stuair spetgar ch'ils documents vegnian consegnads. La lavur administrativa vegn uschia reducida cleramain. La communicaziun po avair lieu en ina furma simpla e chapaivla per tuts. Ultra da quai vesan tuts – tenor lur cumpetenzas – il stadi d'elavuraziun da la procedura. Las prescripziuns da procedura na vegnan betg midadas ed er las disposiziuns dals dretgs da construcziun communals na vegnan betg pertutgadas.


Avantatgs per requirents/-as e collavuraturs/-as communals/-as

  • Registraziun guidada per che las persunas petentas possian registrar las dumondas da construcziun: Ils documents incumplets èn reducids
  • Sustegn da las persunas petentas e dals uffizis cun instrucziuns, glistas da controlla, models ed infurmaziuns
  • La spediziun per posta croda davent: la procedura vegn liquidada senza palpiri
  • Augment d'effizienza grazia a la registraziun e grazia a la consegna electronica dals documents da la dumonda da construcziun
  • Gudogn da temp pervia da l'elavuraziun parallela tras ils uffizis participads
  • Coordinaziun effizienta da las proceduras: las acturas ed ils acturs vegnan guidads tras ils process
  • Transparenza per tuts: il stadi d'elavuraziun actual da la dumonda è visibel
  • Svelt access electronic als documents actuals durant e suenter la procedura
  • Armonisaziun automatica cun funtaunas da datas externas: p.ex. datas dal SIG e datas dal REA (Register federal dals edifizis e da las abitaziuns)

Svilup da la plattafurma: Integraziun d'utilisadras ed utilisaders e soluziuns existentas

Las utilisadras ed ils utilisaders principals da la plattafurma che sto vegnir sviluppada èn las persunas petentas, las redacturas ed ils redacturs dals projects (architectas ed architects, inschigneras ed inschigners), las vischnancas (autoritads da construcziun communalas) sco er ils posts spezialisads chantunals. La finamira è quella da pudair integrar la nova plattafurma cun pauca lavur e cun pitschens custs en lur pratica usitada. Perquai vali da registrar las differentas pretensiuns e modas da lavurar e da coordinar quellas cun ils process da la nova plattafurma digitala. Per ch'ils interess da questas acturas ed acturs possian vegnir integrads en il project è vegnida lantschada ina cooperaziun cumplessiva.

Plirs auters chantuns èn actualmain er vidlonder da sviluppar proceduras digitalas per la permissiun da construcziun u han gia introducì talas. Noss team da project tgira in stretg barat cun quests chantuns per pudair profitar da lur experientschas. Las plattafurmas da tecnologias d'infurmaziun ed ils moduls da software existents ch'èn sa cumprovads, duain – sche pussaivel – vegnir surpigliads ed adattads.


Organisaziun

  • L'incumbensader dal project è l'Uffizi per il svilup dal territori (UST). Il team dal UST ch'è cumpetent per il project, vegn manà dad Omar Selmi (partiziun Planisaziun d'utilisaziun ed EOZ).
  • Sin plaun strategic e professiunal vegn il project accumpagnà d'ina giunta directiva respectivamain spezialisada.
  • La direcziun generala dal project è vegnida surdada a l'interpresa da planisaziun Basler & Hofmann SA cun il manader da project Nicolas Schmidt.

Integraziun en la strategia dad e-government dal Grischun

Il project ePPC è in element central da la strategia dad e-government dal Grischun (prioritad A = da fitg gronda impurtanza) ed è pia suttamess a las prescripziuns da quel. L'e-government gida a concepir las prestaziuns da las autoritads en moda pli simplamain applitgabla, pli transparenta e pli segira. Plinavant creescha l'e-government ina plivalur per la populaziun, per l'economia e per las autoritads e reducescha la lavur ed ils custs per liquidar las fatschentas d'autoritad per tut las parts participadas.


Ulteriuras infurmaziuns chattais Vus qua

Downloads: Fegls d'infurmaziun, resultats dal project ed auter