La Lescha federala davart la planisaziun dal territori (LPT) e l'ordinaziun appartegnenta (OPT) èn vegnidas revedidas. La finamira principala da quest 2. pass da revisiun (titel curt: LPT 2) è la stabilisaziun dal dumber d'edifizis e da las surfatschas sigilladas ordaifer las zonas da construcziun. Las novas disposiziuns entran en vigur en etappas: En vigur gia dapi il 1. da schaner 2026 èn tut las disposiziuns che pon vegnir applitgadas directamain per construir ordaifer la zona da construcziun. A partir dal 1. da fanadur 2026 valan novas regulaziuns davart la stabilisaziun sco er tranter auter davart l'uschenumnada «idea territoriala» e davart la procedura en connex cun dumondas da construcziun posteriuras. Las disposiziuns per realisar las novas prescripziuns federalas en il chantun Grischun vegnan actualmain elavuradas. Qua sutvart chattais Vus las pli impurtantas infurmaziuns:

Webinaris

En il rom da webinaris As infurmain nus davart il stadi actual da la realisaziun:

Il webinari dals 30 d'avrigl 2026 dat ina survista da la LPT 2, explitga las disposiziuns che valan dapi il 1. da schaner 2026 e mussa las consequenzas da las finamiras da stabilisaziun per la lavur dals uffizis da construcziun:
Präsentation
Aufzeichnung der Präsentation
-  Zusammenfassung Fragen und Antworten

Situaziun da partenza

La Lescha federala davart la planisaziun dal territori revedida e l'ordinaziun appartegnenta entran en vigur en etappas il 1. da schaner 2026 ed il 1. da fanadur 2026.
• Raumplanungsgesetz (RPG)
• Ordinaziun davart la planisaziun dal territori (OPT)
• Revision Raumplanungsgesetz - 2. Etappe (RPG 2)

Finamira principala da la LPT 2: Stabilisaziun

La finamira principala da questa revisiun da lescha pertutga il svilup dals edifizis e da las surfatschas sigilladas en ils chantuns. Il dumber total d'edifizis e la summa totala da la surfatscha sigillada ordaifer il territori da construcziun na dastgan betg crescher per dapli che 2 pertschient, cumpareglià cun la valur da referenza. L'agiunta da l'Ordinaziun davart la planisaziun dal territori cuntegna ina glista cun las valurs da referenza. En il chantun Grischun èn quai 50 427 edifizis e 1507 hectaras surfatscha sigillada. Sche questas valurs vegnan surpassadas per 2 pertschient, sto mintga nov edifizi e mintga surfatscha sigillada da nov vegnir cumpensada tras ina demoliziun u tras ina dissigillaziun.

Sche pussaivel na vulain nus mai cuntanscher quest cunfin, per pudair construir er en l'avegnir senza obstachels nunnecessaris ils edifizis e stabiliments ch'i dovra. Actualmain essan nus londervi d'elavurar in concept general che regla, co ch'il svilup ordaifer las zonas da construcziun duai vegnir dirigì senza surpassar las valurs da referenza. Quest concept general sto vegnir francà en in «plan directiv da stabilisaziun» (Plan directiv chantunal), che sto vegnir approvà dal Cussegl federal entaifer 5 onns.

Impurtant èsi da registrar ils edifizis e las sigillaziuns che vegnan vitiers da nov u sche crodan davent. Questas infurmaziuns duain vegnir registradas en moda uschè effizienta sco pussaivel en il rom da las proceduras da permissiun vertentas. Las pretensiuns respectivas per ils documents da dumondas da construcziun vegnan actualmain elavuradas.

Disposiziuns che pon vegnir applitgadas directamain per construir ordaifer la zona da construcziun

Cun la LPT 2 vegnan decretadas novas disposiziuns per construir ordaifer la zona da construcziun. Da nov vegn la precedenza da l'agricultura numnada explicitamain. En tscherts cas èsi pussaivel da reducir las distanzas minimalas che valan en connex cun las emissiuns da canera e d'odur. I dat er novas regulaziuns per energias regenerablas e per stabiliments d'infrastructura. Quellas pertutgan spezialmain la pussaivladad da construir implants solars ed implants per l'utilisaziun da biomassa.

Edifizis e stabiliments illegals u utilisaziuns illegalas ch'existan cumprovadamain gia pli ditg che 30 onns, na ston da princip betg vegnir disfatgs resp. annulladas. Questa simpla garanzia d'existenza vala mo, sche ni l'autoritad communala ni l'autoritad chantunala n'han fin quest termin betg pretendì da rectifitgar il stadi illegal. Questas regulaziuns èn en vigur dapi il 1. da schaner 2026.

Übersicht direkt anwendbare Bestimmungen

Idea territoriala

Cun l'idea territoriala permetta la LPT 2 da determinar en la planisaziun d'utilisaziun zonas spezialas, nua ch'i èn admessas dapli utilisaziuns che quai che la procedura EOZ normala permetta. La premissa per ina tala zona è in plan directiv approvà dal Cussegl federal. En quel stoi esser explitgà, che l'utilisaziun supplementara planisada vegn cumpensada e stgaffescha ina plivalur per il territori, per la natira e per la societad. Quest plan directiv na dastga betg vegnir approvà avant il plan directiv da stabilisaziun. En quest connex vala il concept da bottom-up. Quai vul dir, che las regiuns interessadas ans pon contactar cun lur concepts per l'idea territoriala. Ensemen examinain nus lura l'elavuraziun d'in plan directiv.

Construir illegalmain

Ina finamira da la revisiun da la Lescha federala davart la planisaziun dal territori èsi da franar las construcziuns illegalas ordaifer la zona da construcziun. Perquai datti novas regulaziuns per proceder en cas da dumondas da construcziun posteriuras. En la Lescha federala davart la planisaziun dal territori ed en l'Ordinaziun davart la planisaziun dal territori èsi definì, cura ch'i sto vegnir ordinà in scumond d'utilisaziun u ina demontascha. Da nov po mo pli l'autoritad chantunala decider cun vigur legala davart la renunzia excepziunala al restabiliment dal stadi legal, q.v.d. davart la demontascha da projects da construcziun gia realisads. Questas regulaziuns entran en vigur il 1. da fanadur 2026.

Premia da demoliziun

La Lescha davart la planisaziun dal territori prevesa d'indemnisar demontaschas ordaifer la zona da construcziun. Il chantun Grischun indemnisescha la demontascha d'edifizis e da surfatschas sigilladas a norma da las prescripziuns legalas. La premia da demoliziun entra en vigur il 1. da fanadur 2026. Demontaschas gia fatgas na vegnan betg indemnisadas. Actualmain vegn elavurada in'ordinaziun per eruir ils custs da demoliziun.