Las requirentas ed ils requirents d'asil inoltreschan lur dumonda al cunfin u en in center d'accoglientscha e da procedura dal secretariat da stadi per migraziun (SEM). Il SEM tracta e decida davart la dumonda d'asil.

Il SEM attribuescha las requirentas ed ils requirents d'asil als chantuns. La decisiun d'attribuziun po vegnir contestada mo, sch'ella violescha il princip da l'unitad da la famiglia. Al chantun Grischun vegnan attribuids 2,7 pertschient da tut las requirentas e dals requirents d'asil en Svizra.

En il sectur d'asil ed en il sectur da las fugitivas e dals fugitivs datti las suandantas categorias e cumpetenzas.

Requirentas e requirents d'asil

Persunas ch'entran en Svizra e che inoltreschan ina dumonda d'asil.

Per las requirentas ed ils requirents d'asil è cumpetent l'uffizi da migraziun e da dretg civil dal chantun Grischun (UMDC).

Persunas admessas provisoricamain

Persunas, da las qualas è vegnida refusada la dumonda d'asil. La spedida è insupportabla, inadmissibla u nunpussaivla. Per exempel pervia d'ina guerra en il stadi d'origin.

Il UMDC è responsabel per l'assistenza e per la collocaziun da persunas admessas provisoricamain che sa trategnan dapi main che 7 onns en Svizra.

Las vischnancas da domicil èn responsablas per persunas admessas provisoricamain che sa trategnan dapi passa 7 onns en Svizra. Ils Centers da cussegliaziun sociala surpiglian l'assistenza.

Il post spezialisà per l'integraziun dal UMDC sustegna las persunas admessas provisoricamain a s'integrar.

Fugitivas e fugitivs

Persunas ch'èn exponidas a dischavantatgs serius u che han ina tema motivada da vegnir exponidas a tals dischavantatgs en lur patria u en quel pajais, nua ch'ellas han vivì sco ultim, pervia da lur razza, pervia da lur religiun, pervia da lur naziunalitad, pervia da lur appartegnientscha ad ina tscherta gruppa sociala u pervia da lur opiniuns politicas.

Las vischnancas da domicil èn cumpetentas per las fugitivas ed ils fugitivs. Ils Centers da cussergliaziun sociala surpiglian l'assistenza. L'Uffizi da fatgs socials (USo) als sustegna a tschertgar l'emprima abitaziun.

Il post spezialisà per l'integraziun dal UMDC sustegna las fugitivas ed ils fugitivs a s'integrar.

Fugitivas e fugitivs admess provisoricamain

Persunas che adempleschan il status da fugitiv. Ellas na survegnan però betg asil. Per quai datti dus motivs pussaivels:

• Las persunas adempleschan il status da fugitiv pir sin fundament da lur emigraziun dal stadi d'origin u da lur cumportament suenter l'emigraziun.
• Las persunas han commess in malfatg condemnabel u pericliteschan la segirezza publica da la Svizra.

Las vischnancas da domicil èn cumpetentas per las fugitivas ed ils fugitivs admess provisoricamain. Ils Centers da cussegliaziun sociala surpiglian l'assistenza. Il USo als sustegna a tschertgar l'emprima abitaziun.

Il post spezialisà per l'integraziun dal UMDC sustegna las fugitivas ed ils fugitivs admess provisoricamain a s'integrar.

Persunas cun status da protecziun S

Persunas da l’Ucraina che tschertgan protecziun e che han stuì bandunar lur patria pervi da la guerra, survegnan il status da protecziun S en Svizra. Uschia survegnan las persunas fugidas spert in dretg da dimora, senza stuair percurrer ina procedura d’asil ordinaria.
Persunas cun il status da protecziun S en abitaziuns affittadas vegnan sustegnidas da collavuraturs e collavuraturs dals Centers da cussegliaziun sociala e dal servetsch social da Tavau.
Infurmaziuns davart l’alloschament, l’assistenza ed il sustegn da persunas cun basegn da protecziun da l’Ucraina