Avais Vus observà violenza a chasa u percepì indizis?

Sa dispitan Voss vischins savens fitg dad aut ed avais Vus in nausch sentiment latiers? As dumandais Vus, tge far en talas situaziuns?

I dovra bler curaschi d'intervegnir en ina tala situaziun engrevgianta. Igl è dentant fitg impurtant che Vus daventias activa u activ. Pli baud che Vus faschais quai, e meglier ch'igl è. Violenza a chasa n'è betg ina chaussa privata.

Per persunas pertutgadas da violenza è l'intervenziun d'ordaifer ordvart impurtanta. Per las persunas pertutgadas èsi en talas situaziuns fitg difficil d'ir per agid ord atgna forza.

Tge pudais Vus far sco terza persuna?

En situaziuns acutas:

Sche Vus udis culps u objects che rumpan, èsi impurtant d'alarmar la polizia (117) per far fin a la violenza. Telefonai en cas da dubi pli gugent ina giada memia bler ch'ina giada memia pauc a la polizia. A medem temp èsi impurtant da sa proteger e da na betg metter sasez en privel.

Sche la violenza na capita betg direct en quest mument, As pudais Vus laschar dapli temp.

• Igl è impurtant da tadlar sin Voss sentiment intern, sche Vus avais in suspect.
• Pledentai la persuna pertutgada da violenza. Guardai d'esser persula u persul cun la persuna.
• Exprimi Voss quitads per la persuna. Tadlai la persuna senza valitar.
• Dumandai la persuna, tge sustegn ch'ella giavischa. Proponi in agid concret, senza far pressiun. Vus pudais per exempel telefonar ensemen cun ella al Post da cussegliaziun per l'agid a victimas u As cunvegnir cun ella, co che Vus pudais gidar en ina situaziun acuta.
• Giai per cussegliaziun tar l'Agid a victimas, sche Vus n'essas betg segira u segir, co ir enturn cun questa situaziun. L'Agid a victimas gida er persunas d'ordaifer. Las collavuraturas ed ils collavuraturs èn suttamess a l'obligaziun da discreziun. Sche Vus vulais, pudais Vus descriver la situaziun en moda anonima.
• Hajas pazienza, i dovra temp, curaschi e forza per persunas pertutgadas per sa deliberar d'ina relaziun violenta.