Incumbensas ed activitads

Il post spezialisà Furmaziun professiunala e sport da prestaziun sustegna giuvenils che vulan far – sper la furmaziun fundamentala professiunala – ina carriera sco sportista u sportist da prestaziun. Plinavant è el l'instanza da contact per talents da sport, per geniturs e per manaschis d'emprendissadi.

Scolaras e scolars

La purschida sa drizza a scolaras e scolars dal stgalim superiur, da las classas da talents e da las soluziuns transitoricas sco er a tut ils giuvenils che
• vulan accordar lur finamiras professiunalas cun las pretensiuns individualas dal sport;
• tschertgan ina plazza d'emprendissadi adattada.

Nossa cussegliadra

• sustegna la tschertga da fufragnadis e da plazzas d'emprendissadi flexiblas;
• intermediescha adressas da manaschis d'emprendissadi che sustegnan il sport da prestaziun;
• gida ad elavurar ina cunvegna en scrit tranter il manaschi d'emprendissadi e l'emprendista sportiva u l'emprendist sportiv;
• porscha sustegn en cas da problems durant il temp d'emprendissadi;
• trametta vinavant dumondas a las persunas da contact cumpetentas.

La cussegliaziun è gratuita per giuvenils che n'han betg anc terminà lur emprima scolaziun u betg anc cumplenì 20 onns.

Dumondas davart il sport da prestaziun e la furmaziun professiunala? Nus faschain cussegliaziuns al lieu, respundain Vossas dumondas per e-mail e purschain cussegliaziuns curtas al telefon.

Manaschis d'emprendissadi

Tar il post spezialisà Furmaziun professiunala e sport da prestaziun pon manaschis che han plaschair da scolar atletas giuvnas ed atlets giuvens, sa registrar en in pool da plazzas d'emprendissadi.

Vignetta «Manaschi d'emprendissadi che sustegna il sport da prestaziun» da Swiss olympic

La vignetta vegn surdada a manaschis d'emprendissadi che pussibiliteschan a lur emprendistas ed emprendists – sper la furmaziun fundamentala professiunala – ina carriera en il sport da prestaziun. Per ch'il manaschi d'emprendissadi survegnia la distincziun, sto l'emprendista u l'emprendist posseder almain ina carta da talent da Swiss olympic dal stgalim regiunal ed avair suttascrit ina cunvegna.

Cunvegna en scrit

Cun ils talents da sport resp. cun la represchentanza legala sclereschan ils manaschis d'emprendissadi las dumondas las pli impurtantas areguard l'emprendissadi ed il sport da prestaziun (p.ex. dis da lavur supplementars pajads u betg pajads) e fixeschan quests puncts en ina cunvegna individuala.