Zum Seiteninhalt

Surveglianza da la furmaziun professiunala en il Grischun

Incumbensas ed activitads  

La surveglianza da la furmaziun professiunala è partenaria en la furmaziun professiunala per emprendistas ed emprendists, per manaschis d'emprendissadi sco er per ulteriuras parts participadas sco geniturs, scolas professiunalas spezialisadas, curs intermanaschials, federaziuns professiunalas ed expertas ed experts d'examen. Sche tuts tiran vi da la medema suga en la medema direcziun, alura è la via preparada per ina finiziun da l'emprendissadi curunada da success. 

En il chantun Grischun datti en passa 3300 manaschis d'emprendissadi circa 5500 plazzas d'emprendissadi. Differentas acturas ed acturs da la furmaziun professiunala stgaffeschan premissas da scolaziun optimalas per las emprendistas ed ils emprendists. Manaschis che s'interessan da nov per la furmaziun professiunala cussegliain nus ed als concedin – sche las premissas èn dadas – la permissiun da furmaziun. Las furmaturas ed ils furmaturs da la professiun en ils manaschis d'emprendissadi vegnan preparads per lur incumbensas en curs d'ina emna.

 

Cussegliaziun
Questa purschida sa drizza a las partidas dal contract d'emprendissadi (manaschis d'emprendissadi ed emprendistas ed emprendists resp. lur represchentanza legala).
• Cuntegns da las cussegliaziuns èn:
• promover e sviluppar la qualitad da la scolaziun entaifer il manaschi;
• analisar e dumagnar situaziuns difficilas;
• serrar largias d'infurmaziun;
• porscher sustegn per la diagnosa tempriva da difficultads ed en discurs davart temas delicats.

 

Surveglianza
La surveglianza da la furmaziun professiunala è d'ina vart ina incumbensa legala dal chantun sco er da la confederaziun. Da l'autra vart duai ella vegnir exequida en moda transparenta e chapaivla per las persunas pertutgadas. Incumbensas centralas èn:
• sclerir las premissas da scolaziun dals manaschis;
• emetter permissiuns per la furmaziun;
• controllar / approvar contracts d'emprendissadi;
• intervegnir en situaziuns da crisa;
• controllar la qualitad da la scolaziun entaifer il manaschi;
• examinar eveniments extraordinaris ed eventualmain instradar mesiras.

 

Sias infurmaziuns vegnan tractadas en moda confidenziala.