Tar contaminaziuns d'auas (per exempel ieli, stgima, turblaments, peschs morts) ston ins agir immediatamain. Telefonai a la polizia u als pumpiers. Quels entran en acziun ensemen cun il servetsch da pichet da la protecziun da las auas, giuditgeschan la situaziun ed instradeschan las mesiras necessarias. Il pli savens decida il factur «temp», sch'il motiv d'ina contaminaziun d'ina aua u da l'ambient po vegnir chattà ed il donn vegnir limità.

Telefonai immediatamain a la polizia (117) u als pumpiers (118). Annunzias in di suenter u pli tard na gidan savens nagut!

• A tgi annunziel jau? Sche Vus constatais ina contaminaziun d'ina aua u da l'ambient, annunziai tala immediatamain a la Polizia chantunala (telefon 117). Sch'in basegn d'agir immediat per evitar ina derasaziun dal donn (p.ex. ieli sin l'aua) daventa necessari, annunziai quai als pumpiers (telefon 118).
  
• Tge annunziel jau? Numnai Voss num e Voss numer da telefon per cuntradumondas ed As infurmai al lieu davart il gener e la dimensiun da l'eveniment.
• E lura? Las forzas d'acziun da la polizia resp. dals pumpiers entran en acziun e s'occupan da reparar il donn e da segirar las cumprovas. Per quest intent vegnan ellas sustegnidas dal servetsch da pichet da la protecziun da las auas e da l'ambient. La Polizia chantunala resp. ils pumpiers cloman il servetsch da pichet.
• Tge poss jau far, fin che las forzas d'acziun arrivan? Far fotografias u videos da quai ch'ins vesa ed observar las midadas (apparientscha, odurs, conturns, relaziuns da l'aura e.u.v.).

Il servetsch da pichet da la protecziun da las auas e da l'ambient

Il servetsch da pichet sustegna las forzas d'acziun tar las suandantas incumbensas:

• giuditgar la contaminaziun da l'ambient;
• limitar donns;
• reparar donns;
• tschertgar il motiv resp. il chaschunader;
• dismetter material smerdà;
• prender provas (aua, material da terra).
  

Prevenziun da contaminaziuns

Sche substanzas che pericliteschan l'aua arrivan en l'ambient, n'è savens betg mo periclitada l'aua visibla: er la rait da chanalisaziun u schizunt l'aua sutterrana e da baiver pon esser periclitadas. Savens èsi pussaivel d'evitar talas contaminaziuns cun far attenziun e cun mesiras simplas.

• Sistem d'aua persa. Cun in mantegniment regular dals stabiliments da drenascha pon ins evitar stuppadas. Interpresas da chars da tschitschar e da derschentar gidan ils proprietaris d'immobiglias d'exequir quest mantegniment en moda professiunala.
• Implants tecnics. Mantegnai implants ed apparats tecnics en in stadi da funcziunament perfetg. Blers implants u apparats cuntegnan ielis u auters liquids che pericliteschan las auas. Liquids che pericliteschan las auas ston vegnir depositads en moda segira e tenor las prescripziuns.
• Tegnairchasa. Er en il tegnairchasa datti privels areguard la contaminaziun da las auas. Il tractament malprecaut da colurs, dissolvents, ladims, pesticids e.u.v. po avair consequenzas gravantas per in'aua. Dismettai rests da talas substanzas sur centers da rimnada per ruments spezials e betg sur la chanalisaziun. Resguardai las infurmaziuns e las prescripziuns da segirezza sin l'etichetta.

Motivs

Contaminaziuns da las auas e dal terren pon tranter auter vegnir chaschunadas tras:

• negligientscha;
• nunsavida davart la situaziun da drenascha;
• agir per negligientscha u cun intenziun;
• stabiliments che na funcziunan betg correctamain;
• accidents.