Gruppas accumpagnantas per la digitalisaziun

A partir da l’onn da scola 2022/23 vegnan installadas – sut la direcziun da l’uffizi – trais gruppas accumpagnantas per la digitalisaziun: ina per la scolina fin a la 4. classa dal stgalim primar, ina per la 5./6. classa dal stgalim primar sco er ina per il stgalim secundar I. Mintga gruppa accumpagnanta sa cumpona da quatter fin sis persunas d’instrucziun da la scola populara da tut las regiuns linguisticas. Er il sectur da la pedagogia speziala è represchentà en tut las gruppas accumpagnantas.

Las gruppas accumpagnantas adempleschan duas funcziuns: D’ina vart vegnan rimnadas datas qualitativas da la pratica d’instrucziun en medias ed informatica. Da l’autra vart ha lieu en questa moda in barat d’experientschas regular e direct tranter las persunas d’instrucziun ina cun l’autra sco er cun l’uffizi. Las datas che vegnan gudagnadas servan a l’uffizi per il sectur da medias ed informatica sco basa per purschidas da furmaziun supplementara futuras per las persunas d’instrucziun sco er per il sustegn professiunal da las persunas d’instrucziun.