L'incumbensa principala è da sustegnair en il chantun Grischun ils sforzs da l'organisaziun federala per la promoziun dal sport "giuventetgna + sport". La realisaziun da questa incumbensa cumpiglia oravant tut l'organisaziun da curs da scolaziun e da furmaziun supplementara per las persunas d'instrucziun dal chantun Grischun sco er las lavurs administrativas per il subvenziunament da las purschidas da sport en las uniuns. Tut las activitads en il rom da "giuventetgna + sport" vegnan organisadas en stretga collavuraziun cun la confederaziun, cun ils auters chantuns sco er cun las federaziuns e cun las uniuns da sport dal Grischun.

En il sectur dal sport da scola cumpiglian ils servetschs in'examinaziun da las prestaziuns en furma da l'examen chantunal dal sport da scola, differentas occurrenzas dal sport da scola sco er curs da furmaziun supplementara per persunas che instrueschan sport. Per sustegnair il sport dal dretg privat vegnan mess a disposiziun meds finanzials or dal fond da sport. En il rom da la promoziun generala dal sport sustegna u lantscha il USS projects u programs per promover il sport ed il moviment confurm al temp.

La midada da num da l'anteriur uffizi da sport a graubündenSPORT è vegnida realisada cun la finamira da rinforzar l'identitad cun la promoziun chantunala dal sport.