In trenament multifar e varià en la vegliadetgna d'uffant e da giuvenil è cumprovadamain la meglra basa tant per activitads sportivas durant l'entira vita sco er per in'eventuala carriera en il sport da prestaziun.
Il program 0712 dat in impuls a purschidras e purschiders da sport (uniuns e scolas) per orientar, endrizzar u cumplettar lur purschidas en moda uschè polisportiva sco pussaivel.
Ulteriuras infurmaziuns tar «0712 – Tut enturn il sport» chattais Vus sut www.0712.ch.
Quai ma serva anc oz!
Igl è incontestà ch'ina scuvrida ad ura d'in talent en vista a pussaivels success en il sport da prestaziun daventa adina pli decisiva. Ma la schanza d'esser ina giada ina champiuna u in champiun na daventa betg pli gronda, sche federaziuns ed uniuns cumenzan adina pli baud a recrutar la generaziun giuvna e porschan mo trenaments exclusivamain per ina tscherta disciplina da sport e sche geniturs tramettan lur uffants intenziunadamain adina pli giuvens en tals trenaments da disciplina per ch'els sa spezialiseschian uschè baud sco pussaivel. Co ch'ils exempels da quasi tut las eroxas ed ils eroxs da sport che han actualmain fitg gronds success demussan en moda impressiunanta ch'ina basa polisportiva è stà il cumenzament da lur carriera da pli tard encurunada da success – e tenor lur giudicament da sasez è gist questa basa stada in factur decisiv per l'ulteriur svilup sportiv e per ils success da pli tard.