Dapi l'onn 2005 porscha graubündenSport la retscha d'occurrenzas «Update!Sport». Dapi l'onn 2021 èn la Scola auta spezialisada dal Grischun (SASGR) e l'Associaziun grischuna da sport (AGS) partenarias da las occurrenzas. Mintga onn vegnan purschids differents curs attractivs da scolaziun e da furmaziun supplementara. Ils moduls sa drizzan a funcziunarias e funcziunaris, a trenadras e trenaders sco er a manadras e manaders da G+S ed a coachs da G+S en uniuns da sport en il chantun Grischun. Tut las referentas ed ils referents han enconuschientschas spezialas profundas e dattan cussegls utils per las activitads correspundentas da las uniuns. En ils moduls da furmaziun supplementara dad «Update!Sport» vegnan recepidas e tractadas da maniera fitg pratica tematicas actualas che resultan da la lavur en las uniuns da sport.
Update!Sport Moduls 2026 (Lingua da l'occurrenza: tudestg)
Sche l'energia manca: chapir e constatar ad ura RED-S
Mardi, ils 31 da mars, 18.30 – 20.30 / virtualmain sur Teams / 45.-
Tge effects ha ina mancanza relativa d'energia (RED-S) sin il corp e sin la capacitad da prestaziun? Tge capita, sche atletas ed atlets dovran dapli energia che quai ch'els prendan si sur il nutriment. L'uschenumnà «deficit relativ d'energia en il sport» (RED-S) po avair consequenzas gravantas – per la sanadad, per il svilup e per la capacitad da prestaziun.
Las persunas che participeschan al referat vegnan a savair, co che RED-S sa mussa, tge facturs da ristga ch'i dat e co che las atletas ed ils atlets, las trenadras ed ils trenaders sco er ils geniturs ed ulteriuras persunas da referiment pon prevegnir a RED-S u reagir sin quest deficit.
Referenta: Dr. Joëlle Flück, scienziada da sport e da nutriment, presidenta da la Swiss Sports Nutrition Society, experta spezialisada per nutriment da sport da Swiss Cycling, manadra da la gruppa Nutrition da la OYM SA a Cham, commembra da la Task Force Swiss Olympic
ZUR ANMELDUNG
Dumagnar bain squitsch – chapir e dumagnar grevezzas psichicas en il sport
Gievgia, ils 21 da matg, 18.00 – 20.00, Scola auta spezialisada dal Grischun, Cuira / 45.-
Furnir prestaziuns, ademplir aspectativas, cumparegliar permanentamain – ils uffants e giuvenils sentan gia baud in squitsch psichic, e quai senza ch'els possian sa preparar. Durant l'occurrenza interactiva survegnan las funcziunarias ed ils funcziunaris da sport, las trenadras ed ils trenaders, ils geniturs ed ulteriuras persunas da referiment questa saira enconuschientschas fundadas da la psicologia da sport, da la medischina e da la neurologia davart ils temas: ir enturn cun squitsch, controllar patratgs negativs, definir finamiras realisticas, la pussanza dal subconscient.
Il lavuratori porscha instruments pratics e strategias per gidar ils giuvenils da mussar lur prestaziun maximala il mument ch'i quinta e da colliar en moda persistenta il sport da prestaziun cun la sanadad mentala.
Referenta: Dr. Tina E. L. Dyck, trenadra mentala ASPS, commembra dal Medical Team Swiss Olympic, Chief Education Officer HC Tavau, IOC Safeguarding Officer
ZUR ANMELDUNG
Social media en l'uniun da sport – davent da l'idea al post
Mardi, ils 22 da settember, 18.00 – 21.00, Scola auta spezialisada dal Grischun, Cuira / 45.-
Las medias socialas na dastgan betg pli mancar en il mintgadi da las uniuns e da las federaziuns – ma co pon ins applitgar ellas en moda raschunaivla ed effizienta? Quest modul d'approfundaziun pratic intermediescha las basas per ina buna preschentaziun en las medias socialas e mussa, co che las uniuns e las federaziuns pon cuntanscher lur gruppas en mira.
Suenter in input cumpact davart las pli impurtantas basas, suonda in lavuratori pratic. Las participantas ed ils participants lavuran activamain vi d'agens cuntegns e mettan en la pratica quai ch'els han emprendì.
Referentas e referents: Gianna Gilardi, Andrina Mettle, Delia Lüthi, Sara Niedermayer, Marcel Stutz, Basil Hiltebrand
ZUR ANMELDUNG