Zum Seiteninhalt

La regenza avra la consultaziun tar la revisiun parziala da la lescha da polizia

La regenza grischuna ha deliberà per la consultaziun il sboz per ina revisiun parziala da la lescha da polizia. Cun questa revisiun da la lescha duain vegnir cuntanschidas gist trais differentas finamiras.

Ina da las trais finamiras è la realisaziun da duas incumbensas parlamentaras. L'incumbensa Augustin vul d'ina vart introducir ina procedura d'autorisaziun per proceduras penalas cunter polizistas e polizists. Tar la procedura d'autorisaziun sa tracti d'ina spezia d'examinaziun preliminara che vegn realisada en cas da denunzias cunter polizistas e polizists. L'incumbensa Felix da l'autra vart ha la finamira da meglierar la surveglianza dal spazi public.

A medem temp duain vegnir realisadas las mesiras formuladas en il rapport "Polizia grischuna 2015plus". Tranter auter vegnan circumscrittas e precisadas las incumbensas da las polizias communalas. Ultra da quai vegn proponida ina basa legala che regla tgi che surpiglia ils custs da las incumbensas da las polizias communalas che vegnan ademplidas da la polizia chantunala.

La finala duain er enconuschientschas fatgas vegnir integradas en la revisiun. En spezial cun l'introducziun dal cudesch da procedura penala svizzer sco er dapi il relasch da la lescha da polizia han pudì vegnir rimnadas experientschas preziusas. Tranter auter duain vegnir precisadas la protecziun da datas, las mesiras secretas preventivas da la polizia, l'obligaziun d'annunzia en cas d'expulsiuns per consequenza da violenza a chasa sco er vegnir sclerida la procedura chantunala da multas disciplinaras. Fin ussa pudevan vegnir pronunziadas multas disciplinaras sin plaun federal mo en cas da surpassaments en il traffic sin via. Ussa introducescha la confederaziun la procedura da multas disciplinaras per ulteriurs delicts da bagatella. La confederaziun surlascha dentant als chantuns da reglar las cumpetenzas. Correspundentamain ston vegnir adattadas differentas leschas e fixadas las cumpetenzas respectivas.

La lescha duai entrar en vigur il 1. da schaner 2019. La consultaziun dura fin ils 5 da schaner 2018. Ils documents da consultaziun pon vegnir chargiads giu da la pagina d'internet dal chantun u pon vegnir empustads tar il departament da giustia, segirezza e sanadad (tel. 081 257 25 16).


Infurmaziuns:
cusseglier guvernativ dr. Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch


Gremi: regenza
Funtauna: chanzlia chantunala dal Grischun