La Regenza ha approvà la realisaziun dal nov post da contact e da consultaziun al Seilerbahnweg 7 a Cuira. L'uniun Agid da survivenza dal Grischun (UHG) vegn incumbensada cun la realisaziun operativa e cun il manaschi. Per adattar l'immobiglia vegn garantida ina contribuziun totala maximala dad 1,2 milliuns francs.

Il nov post da contact e da consultaziun (C+C) duai esser avert durant 365dis da las 11.00 fin las 19.00 e render accessiblas en moda simpla e nunbirocratica purschidas d'agid a persunas dependentas. La purschida da basa cumpiglia pussaivladads da sa trategnair e da sa retrair, ina cuschina per persunas senza tetg, cussegliaziun ed intermediaziun, provediment medicinal da basa, la consegna e la dismessa da meds auxiliars da consum, ina bursa da jobs, pussaivladads da tgirar il corp e da lavar la vestgadira sco er in'adressa postala ed in deposit da bagascha per persunas senza abitaziun.

La Regenza ha la finamira da meglierar pass per pass – dentant cunzunt a lunga vista ed en moda persistenta – l'entira purschida per persunas dependentas sco er la situaziun da la populaziun. Ultra dal nov post da contact e da consultaziun cuntinuescha l'uniun UHG cun purschidas existentas, sco «Streetwork» en il spazi public ed il dormitori d'urgenza al Höhenbühlweg 20. Plinavant metta il project da pilot «Housing First» da l'uniun Oase a disposiziun spazi d'abitar a persunas senza abitaziun e/u senza tetg. Questas purschidas vegnan finanziadas dal chantun Grischun cun totalmain var 1,8milliuns francs per onn.

Cumplementarmain a las purschidas chantunalas ha la citad da Cuira concludì in project da pilot da 3 onns per manar in local da consum. Ord vista spezialisada è l'affiliaziun al post da contact e da consultaziun in punct central per il success dal local da consum. La permissiun da construcziun per il C+C planisà e per il local da consum al Seilerbahnweg 7 a Cuira è gia avant maun. Las lavurs da construcziun duain esser terminadas fin il favrer 2026, per che la purschida possia – tenor la dumonda da l'uniun UHG – avrir sias portas il mars 2026.

Per la terza fasa dal project «ALPIN QUATTRO DigitalTwin» ha la Regenza concedì a la Zendra SA ina contribuziun chantunala maximala da circa 190 600 francs als custs d'investiziun respectivamain da circa 27 900 francs als custs da gestiun. Ella ha deliberà questa contribuziun en il rom da la Lescha davart la promoziun da la transfurmaziun digitala en il Grischun.

ALPIN QUATTRO (AQ) DigitalTwin Fasa3 è il resultat dals projects parzials precedents «MVP» e «Fasa 2» ch'èn vegnids sviluppads vinavant. L'instrument da planisaziun digital sustegna implants solars alpins che vegnan construids en il rom dal «Solarexpress». La fasa 3 cumplettescha l'uschenumnà DigitalTwin cun novas funcziuns ed optimescha ils process da l'entir ciclus da vita dal sistem AQ – da la planisaziun fin al manaschi. La finamira è dapli digitalisaziun, dapli effizienza ed il svilup da metodas cumprovadas per il martgà da la fotovoltaica alpina ch'è anc relativamain nov. Quai permetta da far producziuns da seria entaifer ils termins fixads, d'observar standards da qualitad e da concepir la gestiun en moda pli economica. Il project procura per segirezza en connex cun las investiziuns, reducescha las ristgas e promova las cumpetenzas spezialisadas en il Grischun. Plinavant vegn augmentada la cumpetitivitad da las interpresas d'energia, da construcziun e da logistica en il chantun. Quai po er gidar a rinforzar la producziun d'electricitad durant l'enviern.

Ulteriuras infurmaziuns: https://grdigital.digital/

La Regenza ha approvà in project da la citad da Cuira per curreger la Plessur. Dals custs totals da var 3,4 milliuns francs surpiglian il chantun e la Confederaziun maximalmain var 1,87 milliuns francs tenor la cunvegna da program da la nova gulivaziun da finanzas (NGF) en il sectur «Privels da la natira gravitativs tenor la Lescha davart la correcziun dals curs d'aua». Tras il project da correcziun dal curs d'aua vegnan protegidas la Via tudestga, la Via taliana e la Via dal Scanvetg. Perquai paja il chantun supplementarmain ina contribuziun per la construcziun da vias da 153 000 francs.

La Plessur curra en in chanal fortifitgà tras la citad da Cuira, avant ch'ella sbucca en il Rain. Il letg dal chanal è exponì ad in'erosiun latenta. Per evitar che l'aua portia davent material da glera e da sablun, èn vegnidas installadas en il passà numerusas traversas da betun stabilisantas en il letg. Questas traversas furman ina successiun da «stgalims» artifizials e stabiliseschan il letg dal flum. Las rivas dal chanal èn fixadas cun mirs da betun, da crappa e da maulta. Quest sistem da rempars ha ademplì fin ussa ses intent tecnic. En il rom da las controllas regularas dals stabiliments èsi dentant sa mussà, ch'ils rempars existents èn donnegiads en differents lieus. Perquai è la citad da Cuira sa decidida per ina sanaziun voluminusa. Tenor l'urgenza è l'entir project vegnì dividì en tschintg etappas (communicaziuns a las medias davart l'etappa 1, l'etappa 2, l'etappa 3 e l'etappa4). Il project d'exposiziun actual cumpiglia la tschintgavla e (per entant) ultima etappa. En il rom dal project da correcziun actual vegnan tschintg traversas existentas ch'èn donnegiadas, remplazzadas tras rampas a blocs ch'èn surmuntablas per ils peschs. Sin dus trajects d'ina lunghezza da var 360 meters vegnan ils mirs da riva existents reparads tut tenor basegn e munids cun sustegns locals, per garantir a lunga vista lur stabilitad.

 

A partir dal 1. da settember 2025 lavuran las spazzachaminas ed ils spazzachamins grischuns per ina tariffa per ura pli auta. Da nov pon ellas ed els incassar 87 francs per ura per lur prestaziuns. La Regenza ha approvà ina revisiun parziala correspundenta da l'Ordinaziun tar la Lescha davart la protecziun cunter incendis. Cun augmentar la tariffa per 3,55 pertschient adattescha il Grischun la tariffa a la chareschia ch'è s'accumulada. L'ultima giada era la tariffa vegnida adattada per il 1. da matg 2023.

La Regenza ha mess en vigur per il 1. da schaner 2026 las revisiuns parzialas da la Lescha davart ils dretgs politics en il chantun Grischun concernent la midada da la via da recurs tar elecziuns dal Cussegl grond e rectificaziuns formalas sco er concernent cedels electorals per far ina crusch. Plinavant ha ella approvà la revisiun parziala da l'Ordinaziun davart ils dretgs politics en il chantun Grischun.

Las revisiuns parzialas da la Lescha davart ils dretgs politics cumpiglian ina nova regulaziun da la via da recurs tar las elecziuns dal Cussegl grond. Recurs pervia da la violaziun dal dretg da votar e pervia dad irregularitads tar la preparaziun e tar la realisaziun da las elecziuns dal Cussegl grond duain pudair vegnir inoltrads en l'avegnir directamain a la Dretgira administrativa respectivamain a la Dretgira superiura sco suletta instanza chantunala. Plinavant vegnan anc fatgas duas rectificaziuns formalas. Ultra da quai vegnan stgaffidas las basas giuridicas necessarias per vuschar en scrit a l'urna cun cedels electorals per far ina crusch, quai per las elecziuns da maiorz da la Regenza, da las dretgiras regiunalas e dal Cussegl dals chantuns.