Navigation

Inhaltsbereich

  • Revisiun parziala da la Lescha chantunala davart la protecziun da la natira e da la patria (LNPGR; DG 496.000)

    La Regenza ha avert la consultaziun tar il sboz da la revisiun parziala da la Lescha davart la protecziun da la natira e da la patria en il chantun Grischun (Lescha chantunala davart la protecziun da la natira e da la patria, LNPGR; DG 496.000). Tras questa adattaziun da la lescha duain las proprietarias ed ils proprietaris dals bains immobigliars pertutgads survegnir ina pussaivladad da far protesta cunter la decisiun d'inscriver lur object en l'inventari chantunal dals edifizis.

    Cumenzament: 23 da settember 2021
    Fin: 23 da december 2021

  • Revisiun totala da la Lescha davart la promoziun da la tgira d'uffants cumplementara a la famiglia en il chantun Grischun

    La Regenza dat en consultaziun il sboz da la revisiun totala da la Lescha davart la promoziun da la tgira d'uffants cumplementara a la famiglia en il chantun Grischun (DG 548.300). Tras la proposta qua avant maun duai vegnir reglada da nov la finanziaziun da la tgira d'uffants cumplementara a la famiglia en la vegliadetgna prescolara. En il center da la proposta stat la midada da la finanziaziun da l'object vi a la promoziun sin basa da la finanziaziun dal subject.

    Cumenzament: 25 d'avust 2021

    Fin da la consultaziun: 25 da november 2021

  • Refurma da las dretgiras 3 (revisiun parziala da la Constituziun chantunala e revisiun totala da la Lescha davart l'organisaziun giudiziala cun ulteriuras midadas)

    En la sessiun da zercladur 2019 ha il Cussegl grond decidì da fusiunar la Dretgira chantunala e la Dretgira administrativa ad ina dretgira, a l'uschenumnada Dretgira superiura dal chantun Grischun. La Dretgira superiura vegn ad esser cleramain pli gronda che la Dretgira chantunala resp. la Dretgira administrativa. Perquai ston vegnir stgaffidas novas structuras per la Dretgira superiura tant en il sectur da la giurisdicziun sco er en il sectur da l'administraziun giudiziala. Questa occasiun duai vegnir nizzegiada per installar in secretariat general. En l'avegnir duai il secretariat general liquidar las incumbensas administrativas per la Dretgira superiura tenor las instrucziuns dals organs directivs. Qua tras vegnan distgargiads las derschadras ed ils derschaders sco er l'actuariat, uschia ch'els pon sa concentrar pli fitg sin la giurisdicziun. Cun l'installaziun dal secretariat general vegn ademplida ina recumandaziun dal rapport d'examinaziun da Stalder/Uhlmann.

    En il rom da quest project legislativ duai plinavant vegnir optimada la surveglianza giudiziala, ed er la relaziun d'engaschament da las commembras e dals commembers da las autoritads giudizialas duai vegnir precisada. Per las commembras ed ils commembers da las autoritads giudizialas duain plinavant vegnir stgaffidas structuras modernas per pudair gudagnar las persunas optimalas per questa incumbensa. Cun quest project legislativ duain la finala vegnir realisads ils ulteriurs conclus da princip ch'il Cussegl grond aveva prendì en la sessiun da zercladur 2019 areguard l'organisaziun da las dretgiras chantunalas superiuras.


    Cumenzament: 3 d'avust 2021
    Fin: 3 d'october 2021

     

     

  • Revisiun totala da la Lescha davart il traffic public en il chantun Grischun

    La Lescha davart il traffic public en il chantun Grischun (LTP; DG 872.100) è vegnida relaschada per l'emprima giada l'onn 1994 e n'è dapi lura strusch vegnida revedida. Sin plaun federal hai dà en il fratemp numerusas revisiuns. Quellas cumpiglian pliras refurmas da la viafier sco er l'introducziun dal fond per l'infrastructura da viafier (FIV). Ultra da quai è vegnida relaschada l'Ordinaziun davart l'indemnisaziun dal transport regiunal da persunas (OITRP; CS 745.16). Tut questas midadas han consequenzas per l'empustaziun e per la finanziaziun dal traffic public en il chantun Grischun. La revisiun totala che la Regenza ha deliberà per la consultaziun tegna quint da quests svilups e propona adattaziuns sin plaun chantunal. Ultra da quai duain vegnir adattads ils criteris d'avertura en connex cun il traffic public per tut las regiuns en il chantun, e quai resguardond las prescripziuns federalas en il traffic regiunal da persunas.

    Cumenzament: 25 da zercladur 2021
    Fin: 27 da settember 2021

  • Revisiun totala dals contracts normals da lavur per l'agricultura e per il persunal d'alp e per la pastriglia

    Ils dus contracts normals da lavur per l'agricultura e per il persunal d'alp e per la pastriglia dateschan da l'onn 1998 e ston vegnir revedids. Perquai ha l'Uniun purila grischuna supplitgà l'atun 2019 da reveder quests dus contracts normals da lavur. Silsuenter èn vegnids elavurads ils dus sbozs.

    Cumenzament: 12 da matg 2021

    Termin final: 25 da fanadur 2021

  • Participaziun a la Cunvegna interchantunala davart las acquisiziuns publicas revedida (CIAP) e decret d'ina lescha introductiva tar la CIAP

    Cun il project vegn introducì en il chantun Grischun il nov dretg da las acquisiziuns publicas armonisà sin plaun naziunal.

     

    Avertura: 28 d'avrigl 2021

    Termin: 28 da fanadur 2021

  • Revisiun parziala da la Lescha davart ils dretgs politics (introducziun da la votaziun per correspundenza senza custs da porto)

    Tras la revisiun parziala proponida duai vegnir stgaffida en la Lescha davart ils dretgs politics (LDPC) la basa giuridica, per ch'il chantun possia da nov surpigliar ils custs da la votaziun per correspundenza per posta en Svizra.

    Cumenzament: 22 d'avrigl 2021
    Fin: 22 da fanadur 2021

  • Revisiun parziala da la Lescha davart la relaziun da lavur da las collavuraturas e dals collavuraturs dal chantun Grischun (Lescha dal persunal)

    En il program da la Regenza 2021–2024, sut il punct central da svilup «Patrun attractiv», ha la Regenza fixà la finamira ch'il chantun porschia – sco patrun attractiv – a sias collavuraturas ed a ses collavuraturs cundiziuns d'engaschament e da lavur progressivas cun prestaziuns da salari, prestaziuns socialas e prestaziuns accessoricas al salari cumpetitivas. Per pudair recrutar e tegnair las collavuraturas ed ils collavuraturs necessaris, en spezial persunas spezialisadas e caders, duain las cundiziuns d'engaschament e da lavur da la Lescha dal persunal vegnir adattadas a las pretensiuns d'ozendi.

     

    Cumenzament: 22 da mars 2021

    Fin da la consultaziun: 22 da zercladur 2021

  • Revisiun parziala da la Lescha introductiva tar il Cudesch civil svizzer en il sectur dal register funsil

    Sur il portal da geodatas da la GeoGR SA pon tranter auter vegnir consultads fin maximalmain tschintg proprietarias e proprietaris da bains immobigliars per di. La Regenza è vegnida incumbensada d'eliminar – en il senn d'ina reducziun concreta da la birocrazia – la limitaziun da tschintg consultaziuns per di e per persuna en la LItCCS (art. 146c al. 2).

    En il sboz vegni proponì da stritgar la limitaziun da tschintg consultaziuns per di. Empè da quai duai la disposiziun vegnir concepida uschia, che la Regenza sto garantir la protecziun cunter consultaziuns da seria e pia er la protecziun da datas.

    Cumenzament: 15 d'october 2020

    Termin final: 15 da schaner 2021

  • Revisiun parziala da la Lescha davart la Cassa da pensiun dal Grischun

    La Regenza vul rinforzar la Cassa da pensiun dal Grischun (CPGR) e pussibilitar prestaziuns cumpetitivas. Per quest intent duain vegnir auzadas las contribuziuns da spargn per las persunas assicuradas. Cun quai ha la Regenza er reagì sin ils basegns da differents patruns affiliads che pretendan ch'il plan da provediment existent vegnia adattà.

     

    Cumenzament: 30 da settember 2020
    Fin da la consultaziun: 10 da schaner 2021

  • Revisiun parziala da la Lescha davart l'execuziun giudiziala en il chantun Grischun (Lescha davart l'execuziun giudiziala, LExeG; DG 350.500)
    La Lescha davart l'execuziun giudiziala è sa cumprovada da princip e na basegna nagina revisiun totala. Mo singulas disposiziuns ston vegnir adattadas per tegnair quint da las midadas dal dretg federal e dals svilups ch'èn capitads en il fratemp en la pratica da l'execuziun giudiziala dapi che la Lescha davart l'execuziun giudiziala è en vigur. Las midadas correspundentas pertutgan primarmain il transferiment d'incumbensas executivas a terzs che na fan betg part da l'administraziun centrala, l'elavuraziun da datas da persunas e la protecziun giuridica.

    Cumenzament: 3 d'avust 2020
    Fin: 3 da november 2020
  • Elecziun da derschadras e derschaders extraordinaris
    L'elecziun da derschadras e derschaders extraordinaris è in instrument extraordinari che serva a cuvrir in basegn supplementar temporar da derschadras e derschaders a las dretgiras grischunas. Tenor la proposta da la Regenza duai ina tala elecziun supplementara esser pussaivla d'ina vart, sch'ina derschadra u in derschader è previsiblamain impedì d'exequir l'uffizi durant plirs mais pervia da la restricziun da la sanadad corporala, spiertala u psichica u per auters motivs persunals. Da l'autra vart duain derschadras e derschaders extraordinaris pudair vegnir elegids per maximalmain 2 onns, sch'ina dretgira n'è uschiglio betg pli en cas da liquidar dispitas giuridicas entaifer in termin adequat u sch'igl è da temair ch'in tal stadi resultia pervia d'in augment extraordinari da la chargia da lavur. Grazia a l'instrument da l'elecziun supplementara duain las dretgiras grischunas pia vegnir rendidas ablas d'ademplir entaifer in termin adequat ed en la cumposiziun previsa da la lescha las funcziuns giudizialas attribuidas ad ellas er en situaziuns excepziunalas. L'elecziun da derschadras e derschaders extraordinaris serva pia a realisar garanzias constituziunalas da procedura fundamentalas.

    Cumenzament: 10 da zercladur 2020
    Termin final: 10 da settember 2020
  • Revisiun parziala da la Lescha davart la protecziun civila dal chantun Grischun (Lescha da protecziun civila)
    Ils 20 da december 2019 han las chombras federalas deliberà la revisiun totala da la Lescha federala davart la protecziun da la populaziun e la protecziun civila (Lescha davart la protecziun da la populaziun e la protecziun civila, LPPCi; CS 520.1). La revisiun totala duai entrar en vigur il 1. da schaner 2021. Quella ha er effects considerabels sin il dumber d'appartegnents da la protecziun civila (AdPC).
    Per pudair elavurar soluziuns adequatas per la protecziun civila en il chantun Grischun sco er la midada da lescha respectiva, stoi vegnir fatg diever da la pussaivladad che la Confederaziun conceda da prolungar l'obligaziun da far servetsch da protecziun civila fin maximalmain 5 onns suenter l'entrada en vigur.

    Cumenzament: 20 da matg 2020
    Termin final: 20 da fanadur 2020
  • Consultaziun davart l'adattaziun dal sistem electoral per il Cussegl grond

    Il sistem electoral sto vegnir adattà, perquai ch'il Tribunal federal ha incumbensà il chantun Grischun da stgaffir in urden electoral confurm a la Constituziun en vista a las proximas elecziuns da renovaziun dal Cussegl grond.

     

    Cumenzament: 1 d'avrigl 2020
    Termin final: 30 da zercladur 2020

     

  • Consultaziun tar la revisiun parziala da la lescha introductiva tar il cudesch civil svizzer dal chantun Grischun (LItCCS)

    Tras questa revisiun parziala duai la structura organisatorica da las autoritads per la protecziun d'uffants e da creschids (APUC) vegnir adattada a las enconuschientschas fatgas dapi la realisaziun dal nov dretg da la protecziun d'uffants e da creschids dal 1. da schaner 2013.

    La APUC vegn concepida da nov sco autoritad chantunala unica cun filialas regiunalas. In punct central da questa reorganisaziun è quel da mantegnair la francaziun vertenta en las regiuns sco er la cumposiziun interdisciplinara da l'autoritad er en las filialas.
    Ultra da quai duai vegnir stgaffida ina clera regulaziun da l'interfatscha tranter la APUC e las vischnancas concernent l'adossament e la surpigliada dals custs da mesiras en general sco er concernent l'examinaziun da la surpigliada dals custs. En il rom da questa revisiun èsi ultra da quai pussaivel d'adattar il dretg chantunal al dretg federal, ch'è vegnì midà en il fratemp.

    Prolungaziun dal termin: Il termin per la consultaziun è vegnì prolungà fin ils 2 da zercladur 2020, quai en consequenza dal coronavirus.

    Cumenzament: 13 da schaner 2020
    Termin final: 2 da zercladur 2020