Zum Seiteninhalt

Consultaziun tar revisiuns da leschas concernent la flexibilisaziun da las finanzas (GrFlex)

Cun la revisiun da 14 leschas chantunalas duai il cussegl grond survegnir libertads d'agir supplementaras per diriger las expensas. 

Gia dapi onns sa chattan las finanzas chantunalas en in stadi saun. A media ed a lunga vista sa mussan però cleras stretgas. Las finanzas chantunalas pon svelt perder l'equiliber. La regenza ed il cussegl grond ston pudair reagir, sche quai è necessari.

Numerusas leschas chantunalas da differents champs d'incumbensa laschan al cussegl grond relativamain grondas libertads da decider en dumondas finanzialas per diriger las expensas. Percunter cuntegnan pliras leschas obligaziuns d'expensas fixas. Quellas duain vegnir schluccadas. Uschia survegn il cussegl grond er en ils champs d'incumbensa pertutgads libertads adequatas d'agir en dumondas da las expensas. Per cuntanscher quai ston però vegnir revedidas 14 leschas.

Cun las revisiuns da las leschas na vegnan anc prendidas naginas mesiras da spargn. Quant enavant che las libertads d'agir ch'existan e talas che duain vegnir stgaffidas da nov duain vegnir duvradas effectivamain, sto vegnir examinà e decidì pli tard en dependenza da la situaziun finanziala effectiva e da las perspectivas finanzialas. Las cundiziuns generalas per quai duain vegnir determinadas en in concept dal proceder per in pachet da distgargia (concept PD). Quel definescha ordavant cura e tenor tge princips che la regenza sto elavurar e suttametter al conclus dal cussegl grond in pachet da distgargia cun mesiras da spargn concretas.

 

Cumenzament da la consultaziun: 19 da december 2018
Termin final: 31 da mars 2019