Cliccai sin ils singuls temas per survegnir dapli infurmaziuns.
Paja da basa
Tenor la classificaziun da l'Uffizi da persunal en cunvegnientscha cun l'uffizi correspundent e cun il departament en ina da las 28 classas da paja tranter la posiziun da 100% e 142%.
Las pajas mensilas e las pajas per ura vegnan pajadas mintgamai fin ils 25 dal mais, il december fin ils 20. Sch'ils 25 croda sin ina fin d'emna u in firà, vegnan las pajas pajadas ordavant.
Basas legalas
Cumpensaziun da chareschia
Il Cussegl grond examinescha mintg'onn la chareschia e gulivescha ella eventualmain per l'onn suandant.
Basas legalas
13avla paja mensila
Sche la relaziun da lavur è vegnida concludida per dapli che 6 mais u sche quella ha durà pli ditg che 6 mais, ha la collavuratura u il collavuratur il dretg ad ina 13avla paja mensila. Sut tschertas circumstanzas po la Regenza scursanir, stritgar u sistir la 13avla paja mensila.
La 13avla paja mensila importa 1/12 da la paja retratga l'onn chalendar respectiv, incl. in eventual supplement da funcziun. En cas d'in onn da lavur incumplet vegn la 13avla paja mensila indemnisada proporziunalmain al temp da la relaziun da lavur.
Per regla vegn quella pajada il november a las collavuraturas ed als collavuraturs cun ina paja mensila ed il december a las ulteriuras collavuraturas ed als ulteriurs collavuraturs.
Basas legalas
Supplement da funcziun
Sche las incumbensas vegnan amplifitgadas considerablamain areguard la qualitad, po l'instanza d'engaschament conceder in supplement da funcziun da maximalmain 10 pertschient da la paja da basa mensila.
Basas legalas
Premia da prestaziun e premia spontana
Prestaziuns extraordinarias che surpassan il champ d'incumbensas (tenor descripziun da la plazza u cunvegna da finamiras), lavurs che pretendan in impundiment u in engaschament extraordinari, en spezial lavurs da project pretensiusas e che han success, u fitg bunas prestaziuns sur in pli lung temp pon vegnir remuneradas cun premias da prestaziun d'almain in pertschient da la summa da la paja.
Prestaziuns spezialas u engaschaments unics da persunas singulas u da teams pon vegnir onurads cun ina premia spontana.
I n'exista nagin dretg durabel ad ina premia da prestaziun u ad ina premia spontana. Tuttas duas premias èn pajaments unics.
Basas legalas
Supplement per uffants e sustegn per la tgira d'uffants tras terzas persunas
Independentamain dal grad d'occupaziun han collavuraturas e collavuraturs il dretg a supplements per uffants e per scolaziun. Sche omadus geniturs han il dretg a supplements da famiglia, vegnan quels per regla pajads al genitur cun las entradas pli autas. Dapli infurmaziuns chattais Vus sin la pagina d'internet da l'Institut d'assicuranza sociala dal chantun Grischun.
La Regenza po pajar ina contribuziun da fin in terz dals custs da tgira a collavuraturas e collavuraturs responsabels per l'educaziun d'uffants che laschan tgirar quels da terzas persunas.
Basas legalas
Supplements da famiglia per lavurantas e lavurants en l'agricultura
Sche tschertas premissas definidas da la lescha federala èn ademplidas, han puras e purs independents, pastriglia independenta sco era persunas che lavuran sco emploiadas ed emploiads en l'agricultura il dretg d'indemnisaziuns. Dapli infurmaziuns chattais Vus sin la pagina d'internet da l'institut d'assicuranza sociala dal chantun Grischun.
Basas legalas
Supplement social spezial
Il supplement social spezial importa 2'640.- francs per onn e vegn da princip pajà a las collavuraturas ed als collavuraturs che han in'obligaziun da sustegnair finanziala. La Regenza po adattar quel periodicamain a la chareschia.
Basas legalas
Fond d'assistenza per il persunal
En cas d'urgenza pon las collavuraturas ed ils collavuraturs vegnir sustegnids finanzialmain a quint dal fond. Las dumondas elavura l'Uffizi da persunal, ils detagls reglescha la Regenza.
Basas legalas
Supplement da persistenza
Sch'il viadi d'almain 2 kilometers a la lavur vegn fatg regularmain cun il velo privat cun u senza tracziun electrica u cun ils meds da transport publics, vegn pajà annualmain in supplement da persistenza da 300 francs.
Basas legalas
Supplements per incumbensas ed obligaziuns spezialas
Per las incumbensas, las obligaziuns ed ils custs spezials che resultan da l'adempliment da la lavur, sco p.ex. il transferiment en in auter lieu da lavur u en in lieu isolà, per ils custs da vita pli auts al nov lieu da lavur u per incunvegnientschas e l'adempliment da las incumbensas durant il temp liber vegnan pajads supplements da differenta autezza.
Basas legalas
Indemnisaziun da prestaziuns da lavur spezialas
Lavur durant firads generals, la dumengia, la notg, il servetsch da pichet, il servetsch da preschientscha e da squadra sco era sururas vegnan indemnisadas cun temp liber u finanzialmain.
Basas legalas
Spesas
Indemnisadas vegnan spesas che resultan effectivamain e necessariamain sco custs supplementars durant l'adempliment d'incumbensas uffizialas.
Basas legalas
Prevenziun professiunala – cassa da pensiun
Las collavuraturas ed ils collavuraturs dal chantun Grischun, da las dretgiras chantunalas e dals instituts autonoms da dretg public èn assicurads tar la Cassa da pensiun dal Grischun.
Il dabun da vegliadetgna vegn constituì cuminaivlamain da Vus e da Vossa patruna u Voss patrun da lavur cun contribuziuns da spargn. Las contribuziuns da spargn incl. ils tschains ed eventuals apports facultativs finanzieschan Vossa renta da vegliadetgna. Las contribuziuns da ristga cuvran las ristgas en cas da mort e d'invaliditad.
Las persunas assicuradas pon da princip tscherner da trais differents plans da spargn. Ellas ed els decidan sezs quant autas contribuziuns ch'els vulan pajar. Sche Vus pajais voluntarmain contribuziuns pli autas, profitais Vus d'ina renta da vegliadetgna pli auta.
Ulteriuras infurmaziuns davart las contribuziuns da spargn chattais Vus sin la pagina d'internet da la Cassa da pensiun dal Grischun. La Cassa da pensiun dal Grischun infurmescha gugent persunalmain davart soluziuns da provediment pussaivlas.
Basas legalas
Paja en cas d'impediment da lavur
- 100% pajament cuntinuà dal salari durant 16 emnas suenter la pagliola (congedi da maternitad pajà).
- 100% pajament cuntinuà dal salari durant 13 dis suenter la naschientscha u suenter l'adopziun (congedi da paternitad pajà).
- 100% en cas d'ina malsogna fin 730 dis, en cas d'in accident fin il recumenzament da la lavur.
- 100% durant il servetsch militar, il servetsch civil ed il servetsch da protecziun civila obligatori.
- 100% durant congedis curts per eveniments spezials.
- Las premias per l'assicuranza d'accidents da lavur surpiglia il Chantun. Las premias per l'assicuranza d'accidents ordaifer la lavur van a quint da las collavuraturas e dals collavuraturs. Per las persunas ch'èn assicuradas tar la SUVA surpiglia il Chantun la part da las premias che surpassa la premia da las persunas ch'èn assicuradas en moda privata tenor la Lescha federala davart l'assicuranza d'accidents.
Basas legalas