Sco cunfinari/a valan burgais d'UE/AECL che sa chattan resp. abiteschan en in stadi da l'UE/l'AECL e che han in'activitad da gudogn en Svizra.
Cunfinaris/as dals stadis commembers da l'UE/l'AECL disponan da mobilitad professiunala e geografica. Per els na valan betg pli zonas da cunfin. Els pon uschia abitar dapertut en ils stadis da l'UE/l'AECL e lavurar dapertut en Svizra. Cundiziun è almain il return emnil al domicil ester.
La permissiun da cunfinari da l'UE/l'AECL è valaivla tschintg onns, premess ch'ina conferma da lavur ubain in contract da lavur saja avant maun ch'è valaivel illimità u da passa in onn. Sche la conferma da lavur ubain il contract da lavur vegn concludì per ina durada da valaivladad da pli pauc ch'in onn, ma pli ditg che trais mais, sa drizza la durada da valaivladad da la permissiun da cunfinari tenor la durada da la conferma respectivamain il contract da lavur. Per ina durada d'engaschament da fin trais mais vala la procedura d'annunzia.
Ins sto inoltrar:
- Il formular da dumonda A1 cun conferma da lavur dal patrun ubain il contract da lavur
- Ina copia da la carta d'identitad valaivla u dal pass valaivel
Il formular da dumonda ston ins inoltrar ultra dals documents precedents tras la controlla d'abitants da la vischnanca cumpetenta dal lieu da patrun en il chantun Grischun.
Ulteriuras infurmaziuns survegnis Vus dal ressort d'entrada, numer da telefon: 081 257 25 25.
Link al fegl d'infurmaziun