Cuntegn da la pagina

Curatellas

Curatellas fatgas sin mesira

La APUC examinescha ina mesira uffiziala, sch'ina persuna maiorenna po liquidar sezza sias fatschentas mo per part u na las po insumma betg pli liquidar sezza. Ina mesira vegn ordinada pir, sch'il sustegn da la persuna basegnusa tras terzas persunas na tanscha betg u para gia d'emprim ennà d'esser insuffizient e sch'i n'è er betg vegnida procurada in'atgna prevenziun suffizienta.

 

Tut tenor il motiv e tut tenor il basegn da protecziun po la APUC ordinar differentas furmas da curatellas. Mintga mesira uffiziala sto esser necessaria, adattada e commensurada per la persuna pertutgada. En il nov dretg da la protecziun da creschids discurran ins perquai che la curatella sco er ils champs d'incumbensas appartegnents vegnian fatgs sin mesira. Ils champs d'incumbensas pon pertutgar il sustegn persunal, la tgira da las entradas e da la facultad u la correspundenza giuridica. Tut tenor il champ d'incumbensas pon las curatellas vegnir cumbinads ina cun l'autra. L'abilitad d'agir da la persuna pertutgada po vegnir restrenschida per tscherts secturs tut tenor la necessitad. En cas d'ina curatella cumplessiva scroda l'abilitad d'agir dal tuttafatg. Avant che decider examinescha la APUC exactamain, tge mesiras ch'èn adattadas, necessarias e commensuradas per la persuna pertutgada sin tge champ. La mesira uffiziala vegn annullada sin dumonda da la persuna pertutgada u d'ina persuna da confidenza u d'uffizi, sch'i na dat nagin motiv pli per ina cuntinuaziun. 

Curatella accumpagnada

Sch'ina persuna è abla da giuditgar sin tscherts champs ed è en il cas da communitgar bain cun la procuratura u cun il procuratur, po vegnir ordinà – cun il consentiment da la persuna pertutgada – in sustegn accumpagnant e cussegliant per tscherts champs d'incumbensas. Sin quest champ n'ha la procuratura u il procuratur nagin dretg da represchentanza, ella u el sustegna e cusseglia mo la persuna pertutgada. 

Curatella da represchentanza

Ina curatella da represchentanza vegn constituida, sche la persuna basegnusa na po betg liquidar tschertas fatschentas e sto perquai vegnir represchentada. La persuna pertutgada sto laschar metter a quint las acziuns da represchentanza da la procuratura u dal procuratur. Sche necessari po la APUC restrenscher l'abilitad d'agir da la persuna pertutgada.

Curatella participativa

Ina curatella participativa vegn constituida, sche tschertas acziuns da la persuna sut curatella dovran mintgamai il consentiment da la procuratura u dal procuratur. Per la vigur da questas acziuns è pia necessari tant il consentiment da la persuna sut curatella sco er quel da la procuratura u dal procuratur.

Curatella cumplessiva

Ina curatella cumplessiva vegn constituida, sch'ina persuna è permanentamain inabla da giuditgar, sa periclitescha adina puspè cun sias acziuns ed è perquai spezialmain zunt basegnusa. La curatella cumplessiva vala per tut las fatschentas da la tgira da persunas, da la tgira da la facultad e da la correspundenza giuridica. La procuratura u il procuratur decida e represchenta la persuna pertutgada sin tut quests champs. L'abilitad d'agir da la persuna pertutgada croda davent.