Zum Seiteninhalt

Disposiziun dal pazient

En ina disposiziun dal pazient po ina persuna abla da giuditgar fixar las mesiras medicalas ch'ella accepta u refusa, en cas ch'ella daventa inabla da giuditgar. Ella po er numnar ina persuna che duai discutar cun la media responsabla u cun il medi responsabel las mesiras medicalas e decider en ses num, en cas ch'ella è inabla da giuditgar. En la disposiziun dal pazient po ella dar directivas a la persuna numnada.

La disposiziun dal pazient sto esser redigida en scrit, datada e suttascritta. Tgi che constituescha ina disposiziun dal pazient, po laschar inscriver la constituziun ed il lieu da deposit sin la carta d'assicuranza. Ina tala disposiziun po vegnir revocada u midada da tut temp.

 

Mintga persuna da confidenza da la pazienta u dal pazient po s'annunziar en scrit tar la APUC, sche la disposiziun dal pazient na vegn betg resguardada, sch'ils interess da la persuna inabla da giuditgar èn periclitads u na vegnan betg pli garantids ubain sche la disposiziun dal pazient na sa basa betg sin la libra voluntad. La APUC sto alura examinar da prender mesiras uffizialas.