Zum Seiteninhalt

Plazzament per motivs da provediment

Ina persuna che patescha d'in disturbi psichic u d'in impediment spiertal u ch'è grevamain negligida dastga – tenor il cudesch civil svizzer – vegnir plazzada en ina instituziun adattada, sch'il tractament necessari u l'assistenza na po betg vegnir realisà en autra moda. Sco disturbis psichics valan tranter auter psicosas, malsognas affectivas, demenza, spezialmain demenza en la vegliadetgna sco er malsognas da dependenza (p.ex. dependenza da drogas, da medicaments e d'alcohol). Sco impediment spiertal valan defects d'intelligenza innats u acquistads da differents grads da grevezza. Sut greva negligientscha chapeschan ins l'existenza d'in stadi che cuntrafaschess a la dignitad umana da la persuna basegnusa, sch'ins na dess betg ad ella l'assistenza necessaria en ina instituziun.

 

Per il tractament u per l'assistenza sto star a disposiziun ina instituziun adattada. Ultra dals ospitals e da las clinicas psichiatricas vegnan en dumonda er chasas da persunas attempadas e da tgira, gruppas d'abitar assistidas e.u.v. Las prescripziuns davart il plazzament per motivs da provediment ston vegnir observadas en l'entir vast spectrum da las instituziuns che retschaivan las persunas pertutgadas, er là, nua che la libertad da la persuna pertutgada è main restrenschida ch'en la partiziun serrada d'ina clinica.

 

Il plazzament per motivs da provediment è ultra da quai mo admess:

  • sch'el è necessari, q.v.d. sche la persuna na sa lascha betg tractar voluntarmain perquai ch'ella na chapescha betg la malsogna,
  • sch'el è proporziunal, q.v.d. sche nagin med pli miaivel, sco per exempel in tractament ambulant, na maina a la finamira e
  • sche la persuna pertutgada periclitescha sasezza u autras persunas pervia da ses disturbi psichic, pervia da ses impediment spiertal u pervia da greva negligientscha.

En il chantun Grischun èn las medias ed ils medis autorisads d'ordinar in plazzament per motivs da provediment che dastga durar maximalmain 6 emnas. Il plazzament per motivs da provediment tras la media u il medi scroda il pli tard, cur che la durada fixada è scadida. Il plazzament per motivs da provediment tras la media u il medi po vegnir prolungà tras in plazzament per motivs da provediment ordinà d'uffizi mo da la APUC – sche las premissas per il plazzament èn anc adina dadas – e vegn fatg sin dumonda da l'instituziun che tracta. Uschespert che las premissas per il plazzament per motivs da provediment n'èn betg pli ademplidas, sto la persuna pertutgada vegnir relaschada. La persuna pertutgada u ina persuna da sia confidenza po dentant dumandar da tut temp la relaschada.

 

Qua chattais Vus fegls d'infurmaziun e formulars per emplenir.