Zum Seiteninhalt

Procuraturas e procuraturs

Nominaziun da las procuraturas e dals procuraturs

Cun ordinar ina mesira uffiziala nominescha la APUC sco procuratura u procuratur ina persuna ch'è adattada persunalmain e professiunalmain per las incumbensas previsas. Quai po esser insatgi dals conturns da la persuna pertutgada, ina procuratura u in procuratur da la curatella professiunala ubain ina procuratura professiunala u in procuratur professiunal d'in servetsch spezial. Excepziunalmain pon vegnir nominadas er pliras persunas per differents champs d'incumbensas.

Las persunas pertutgadas han la pussaivladad da proponer sco mandataria u mandatari ina persuna, envers la quala ellas han confidenza (confamigliara u confamigliar, enconuschenta u enconuschent e.u.v.). Ma la APUC vegn ad examinar cun quità che la persuna proponida saja er concretamain qualifitgada. Sche la persuna n'ademplescha betg las pretensiuns en il cas concret, vegn la APUC a nominar insatgi auter. 

Mandats en la protecziun d'uffants

En la protecziun d'uffants vegnan nominadas per regla persunas spezialisadas sco procuraturas e procuraturs.

Procuraturas e procuraturs privats

Senza l'engaschament da gidantras e gidanters voluntars na fiss betg garantida l'assistenza da blers umans basegnus, perquai che blers n'han betg parents u enconuschents ch'èn pronts da surpigliar in mandat uffizial. Perquai ha la APUC in grond interess da chattar voluntarias e voluntaris ch'èn pronts d'accumpagnar umans basegnus en il rom d'in mandat uffizial. Ademplir ina tala incumbensa è adina er ina sfida persunala ed è l'occasiun per blers contacts e per novas experientschas interessantas.

Sche Vus avais interess da surpigliar l'incumbensa d'in mandatari privat, As drizzai per plaschair a la APUC da Voss lieu da domicil. Cun Voss engaschament gidais Vus considerablamain a render noss chantun pli bainvulent envers umans che dovran agid. Persunas privatas che sa decleran prontas da surpigliar l'incumbensa d'ina mandataria u d'in mandatari privat vegnan preparadas cun quità – tras la APUC u tras collavuraturas e collavuraturs professiunals che la APUC ha tschernì – per lur incumbensa ed en cas da difficultads survegnan ellas cussegls e sustegn. 

Indemnisaziun

Las persunas che mainan mandats han il dretg da survegnir ina indemnisaziun commensurada. Quella vegn pajada ubain or da la facultad da la persuna assistida ubain, sch'i n'è avant maun nagina facultad u sch'igl è avant maun mo ina pitschna facultad, or da daners dal maun public. L'autezza da l'indemnisaziun sa drizza cunzunt tenor la lavur da la mandataria u dal mandatari e tenor las relaziuns d'entrada e da facultad da las persunas assistidas.

Surveglianza

Las mandatarias ed ils mandataris exequeschan lur uffizi per gronda part independentamain e surpiglian er la responsabladad per quai. Il chantun stat bun en cas d'in agir illegal en il sectur da las mesiras uffizialas. Tut las mandatarias e tut ils mandataris stattan sut la surveglianza da la APUC che controlla ed accumpogna lur activitad, ch'examinescha en intervals regulars ils rapports da gestiun da las procuraturas e dals procuraturs e che sto dar ses consentiment pertutgant fatschentas extraordinarias sco partiziuns d'iertas, venditas d'immobiglias e.u.v.